శివదీక్షతో ఆధ్యాత్మిక శోభ.. నకిరేకల్ రామలింగేశ్వరాలయంలో భక్తుల సందడి కార్తీకమాసం తొలిరోజే 100 మందికి పైగా శివమాల ధారణ.. 30 మంది కన్నె స్వాములు

నకిరేకల్, మేజర్ న్యూస్:కార్తీకమాసం ప్రారంభం సందర్భంగా నల్గొండ జిల్లా నకిరేకల్ పట్టణంలోని శ్రీ రామలింగేశ్వర స్వామి దేవాలయంలో భక్తిభావం వెల్లివిరిసింది. మాసం మొదటి రోజునే 100 మందికి పైగా భక్తులు శివదీక్ష స్వీకరించి మాలధారణ చేశారు. ఈ ఏడాది ప్రత్యేకంగా సుమారు 30 మంది కన్నె స్వాములు తొలిసారిగా శివమాల ధరించడం విశేషం.

ఆలయ ప్రధాన అర్చకులు జిగురు లక్ష్మీనరసింహం ఆధ్వర్యంలో స్వాములకు శాస్త్రోక్తంగా మాలధారణ కార్యక్రమం నిర్వహించారు. అనంతరం గురుస్వామి కట్టకూరి వెంకన్న గౌడ్ నూతన కన్నె స్వాములకు శివదీక్ష నియమాలు, పూజా విధానాలను వివరించారు. ఆలయ కమిటీ చైర్మన్ ఉప్పల రమేష్, ధర్మకర్తలు స్వాములకు పూజా విధానం పుస్తకాలను పంపిణీ చేశారు.

ఇళ్లలో పూజలు చేసుకునేందుకు సౌకర్యం లేని స్వాములు ఆలయ మండపంలోనే ప్రత్యేక పీఠాన్ని ఏర్పాటు చేసుకుని పూజలు నిర్వహించుకునేలా కమిటీ సహకరిస్తుందని తెలిపారు. అలాగే దీక్ష చేపట్టిన శివస్వాములకు 41 రోజులపాటు ప్రతిరోజూ మధ్యాహ్నం అన్నప్రసాద వితరణ ఏర్పాటు చేస్తున్నట్లు చైర్మన్ ఉప్పల రమేష్, ధర్మకర్తలు వెల్లడించారు..