దీపావళి వేళ జూదరులపై పోలీసుల మెరుపు దాడులు..

సూర్య, నాగిరెడ్డి పేట్, దీపావళి పండుగ వేళ పేకాట ఆడుతూ చట్టవిరుద్ధ కార్యకలాపాలకు పాల్పడుతున్న వారిపై పోలీసులు కొరడా ఝుళిపించారు. నాగిరెడ్డి పేట ఎస్సై అగస్త్య భార్గవ్ గౌడ్ ఆధ్వర్యంలో దీపావళి వేళ ప్రత్యేక నిఘా ఏర్పాటు చేసి, గత మూడు రోజుల వ్యవధిలో నాలుగు చోట్ల వరుసగా మెరుపు దాడులు నిర్వహించినట్లు ఎస్సై తెలిపారు. ఈ దాడుల్లో మొత్తం 22 మంది పేకాటరాళ్లను పట్టుకొని, వారి వద్ద నుంచి రూ.37,282 నగదు, 12 సెల్‌ఫోన్లు, 2 ద్విచక్ర వాహనాలను స్వాధీనం చేసుకున్నట్లు ఎస్సై భార్గవ్ గౌడ్ తెలిపారు. సోమవారం మండల కేంద్రంలోని గోపాల్ పేట గ్రామంలోని సుభాష్ చంద్రబోస్ విగ్రహం సమీపంలో పేకాట ఆడుతున్న నలుగురిని పట్టుకొని రూ.1,572 నగదు, 2 సెల్‌ఫోన్లు స్వాధీనం చేసుకున్నట్లు తెలిపారు. తాండూర్ గ్రామంలో అంజయ్య ఇంట్లో పేకాట ఆడుతున్న మరో నలుగురిని పట్టుకొని రూ.8,520 నగదు,4 సెల్‌ఫోన్లు స్వాధీనం చేసుకున్నామన్నారు. అదేవిధంగా జలాల్‌పూర్ గ్రామ శివారులోని ఎల్లమ్మ గుడి సమీపంలో పేకాట ఆడుతున్న ఆరుగురిని పట్టుకొని రూ.15,050 నగదు, 4 సెల్‌ఫోన్లను స్వాధీనం చేసుకున్నట్లు పేర్కొన్నారు. టేకుల చెరువు తండా శివారులో నిర్వహించిన నాలుగో దాడిలో ఎనిమిది మందిని పట్టుకొని రూ.12,140 నగదు, రెండు సెల్‌ఫోన్లు, రెండు ద్విచక్ర వాహనాలను స్వాధీనం చేసుకున్నట్లు ఎస్సై తెలిపారు.పేకాట, జూదం వంటి చట్టవిరుద్ధ కార్యకలాపాలకు పాల్పడే వారిపై పోలీసుల నిఘా నిరంతరం కొనసాగుతుందని ఎస్‌ఐ భార్గవ్ గౌడ్ హెచ్చరించారు. ఇలాంటి అసాంఘిక కార్యకలాపాలకు పాల్పడే వారిపై ఎట్టి పరిస్థితుల్లోనూ ఉపేక్షించకుండా చట్టప్రకారం కఠిన చర్యలు తీసుకుంటామని స్పష్టం చేశారు. గ్రామాల్లో ఎక్కడైనా పేకాట లేదా ఇతర చట్టవిరుద్ధ కార్యకలాపాలు జరుగుతున్నట్లు తెలిస్తే పోలీసులకు సమాచారం అందించాలని ప్రజలను కోరారు.