రేపటి నుంచి కార్తీక మాసం ప్రారంభం.. శివకేశవుల ఆరాధనకు ప్రత్యేక ప్రాధాన్యత

కోహిర్ :ఆధ్యాత్మికంగా ఎంతో విశిష్టత కలిగిన కార్తీక మాసం నవంబర్ 10 నుంచి ప్రారంభం కానుంది. హిందూ సంప్రదాయంలో కార్తీక మాసాన్ని అత్యంత పవిత్రమైన మాసంగా భావిస్తారు. ఈ మాసంలో భక్తులు ప్రత్యేక పూజలు, నోములు, వ్రతాలు, ఉపవాసాలు, దీపారాధనలతో శివకేశవులను ఆరాధిస్తారు. ముఖ్యంగా పరమశివునికి అత్యంత ప్రీతికరమైన మాసంగా కార్తీక మాసానికి ప్రత్యేక గుర్తింపు ఉంది.ఈ నెల రోజుల పాటు ఆలయాల్లో ప్రత్యేక పూజలు, అభిషేకాలు, దీపోత్సవాలు నిర్వహించనున్నారు. భక్తులు తెల్లవారుజామునే నదులు, చెరువులు, పవిత్ర పుష్కరిణుల్లో స్నానాలు ఆచరించి కార్తీక దీపాలను వెలిగిస్తారు. కార్తీక సోమవారాలకు విశేష ప్రాధాన్యత ఉండటంతో శివాలయాలు భక్తులతో కిటకిటలాడనున్నాయి.ఈ ఏడాది కార్తీక మాసంలో పలు ముఖ్యమైన పర్వదినాలు వరుసగా రానున్నాయి. నవంబర్ 13న నాగుల చవితి, నవంబర్ 16న తొలి కార్తీక సోమవారం జరగనున్నాయి. ఈ సందర్భంగా భక్తులు నాగదేవతలకు ప్రత్యేక పూజలు నిర్వహించడంతో పాటు శివాలయాలను సందర్శించి స్వామివారికి అభిషేకాలు, అర్చనలు నిర్వహించనున్నారు.కార్తీక మాసమంతా భక్తిశ్రద్ధలతో పూజలు, దీపారాధనలు నిర్వహిస్తూ ఆధ్యాత్మిక వాతావరణంలో భక్తులు గడపనున్నారు.