అమెరికన్ హెల్త్‌కేర్ రంగంలో భారీ ఒప్పందం

సూర్య అంతర్జాతీయ డెస్క్: అమెరికాకు చెందిన ప్రముఖ శస్త్రచికిత్స సేవల సంస్థ 'సర్జరీ పార్ట్‌నర్స్' (Surgery Partners) ను కొనుగోలు చేసేందుకు లాభాపేక్ష లేని ఆరోగ్య సంరక్షణ దిగ్గజం 'బాన్ సెకౌర్స్ మెర్సీ హెల్త్' (Bon Secours Mercy Health) అనుబంధ సంస్థ 'హెల్త్‌స్పాన్ పార్ట్‌నర్స్' ముందుకొచ్చింది. పోటీ బిడ్ రావడం మరియు ఇతర పరిణామాల నేపథ్యంలో ఈ కొనుగోలు కోసం తన ఆఫర్‌ను గరిష్టంగా 6 బిలియన్ డాలర్లకు (సుమారు రూ. 50,000 కోట్లు) పెంచుతున్నట్లు సోమవారం ప్రకటించింది.

గతంలో కుదిరిన ప్రాథమిక ఒప్పందం ప్రకారం షేరుకి 23.50 డాలర్లుగా ఉన్న ఆఫర్, తాజాగా 25 డాలర్లకు పెంచారు. ఈ విలీన ప్రక్రియ ఆలస్యమైతే ప్రతి నెలా అదనపు చెల్లింపులు చేసే వెసులుబాటు కల్పించడంతో, మొత్తం విలువ షేరుకి 26.61 డాలర్ల వరకు చేరే అవకాశం ఉందని కంపెనీలు వెల్లడించాయి. ప్రైవేట్ ఈక్విటీ దిగ్గజం బెయిన్ క్యాపిటల్ (Bain Capital) కూడా ఈ ఒప్పందానికి మద్దతు ఇస్తుండటం గమనార్హం.

అమెరికా వ్యాప్తంగా వందలాది సర్జరీ సెంటర్లు మరియు ఆసుపత్రులను నిర్వహిస్తున్న సర్జరీ పార్ట్‌నర్స్‌ను పూర్తిగా ప్రైవేట్ సంస్థగా మార్చడమే లక్ష్యంగా ఈ భారీ విలీన ఒప్పందం కొనసాగుతోంది. ఆరోగ్య రంగంలో ఔట్‌పాషెంట్ కేర్ సేవలను మరింత విస్తృతం చేసేందుకు ఈ ఒప్పందం ఎంతగానో దోహదపడుతుందని ఆర్థిక నిపుణులు విశ్లేషిస్తున్నారు.