నార్డియా బ్యాంకుకు భారీ ఊరట

సూర్య అంతర్జాతీయ డెస్క్: ప్రఖ్యాత యూరోపియన్ బ్యాంకింగ్ దిగ్గజం నార్డియా (Nordea) కు డెన్మార్క్ కోర్టులో ఊరట లభించింది. మనీలాండరింగ్ నిబంధనలను పాటించడంలో వైఫల్యం చెందిందనే ఆరోపణలపై కోపెన్‌హాగెన్ కోర్టు సోమవారం తుది తీర్పు వెలువరించింది. ఈ క్రిమినల్ కేసులో నార్డియా బ్యాంకుకు 155 మిలియన్ల డానిష్ క్రోన్ల (సుమారు 23.14 మిలియన్ డాలర్లు లేదా భారత కరెన్సీలో దాదాపు రూ. 195 కోట్లు) జరిమానా విధిస్తూ కోర్టు ఆదేశాలు జారీ చేసింది.

2012 నుంచి 2015 మధ్య కాలంలో డెన్మార్క్‌లోని నార్డియా బ్రాంచ్ ద్వారా జరిగిన లావాదేవీలలో యాంటీ-మనీలాండరింగ్ (AML) నియంత్రణలను బ్యాంకు సరిగ్గా పాటించలేదని ప్రాసిక్యూషన్ ఆరోపించింది. రష్యన్ క్లయింట్లకు సంబంధించిన బిలియన్ల కొద్దీ అనుమానాస్పద లావాదేవీలను అడ్డుకోవడంలో బ్యాంకు విఫలమైందని పేర్కొంటూ, ప్రాసిక్యూషన్ ఏకంగా 6.6 బిలియన్ డానిష్ క్రోన్ల (సుమారు రూ. 8,300 కోట్లు) భారీ జరిమానా విధించాలని కోరింది. అయితే ప్రాసిక్యూషన్ కోరిన భారీ మొత్తంతో పోలిస్తే కోర్టు విధించిన జరిమానా అత్యంత స్వల్పం కావడం గమనార్హం.

ఈ విచారణలో నార్డియా బ్యాంకుపై మోపబడిన ఏడు అభియోగాలలో ఐదింటి నుంచి కోర్టు బ్యాంకును నిర్దోషిగా తేల్చింది. మిగిలిన రెండు అంశాలలో మాత్రమే లోపాలు ఉన్నట్లు గుర్తించి ఈ జరిమానా విధించింది. డెన్మార్క్ బ్యాంకింగ్ చరిత్రలో మనీలాండరింగ్ ఆరోపణలపై కోర్టు విచారణను ఎదుర్కొన్న తొలి కేసు ఇదే కావడం గమనార్హం. ఈ తీర్పుపై కోర్టు ఆదేశాలను పూర్తిగా సమీక్షించిన తర్వాత అప్పీల్‌కు వెళ్లే అంశంపై నిర్ణయం తీసుకుంటామని బ్యాంకు యాజమాన్యం వెల్లడించింది.