అయ్యప్ప భక్తుల కోసం ఉచిత భోజన వసతి (ప్రసాద వితరణ) ను ప్రారంభించిన స్వామి

విజయనగరం మేజర్ న్యూస్, నవంబరు 9:

కార్తీక మాసాన్ని పురస్కరించుకుని సోమవారం విజయనగరంలోని పంచముఖ ఆంజనేయస్వామి ఆలయంలో 41 రోజుల అయ్యప్ప దీక్షను చేపట్టిన భక్తుల కోసం ఏర్పాటు చేసిన ఉచిత భోజన వసతి (ప్రసాద వితరణ) కార్యక్రమాన్ని మాజీ డిప్యూటీ స్పీకర్ కోలగట్ల వీరభద్ర స్వామి ప్రారంభించారు.

ఈ సందర్భంగా కోలగట్ల వీరభద్ర స్వామి మాట్లాడుతూ.. సుమారు 15 సంవత్సరాల క్రితమే నిత్య అన్నదాన కార్యక్రమాన్ని ప్రారంభించాలనే సంకల్పం కలిగిందని, ఆలయ కమిటీ సభ్యుల ప్రోత్సాహంతో పంచముఖ ఆంజనేయస్వామి ఆలయంలో నిత్య అన్నదాన కార్యక్రమం విజయవంతంగా కొనసాగుతుండడం సంతోషకరమని తెలిపారు. ఈ కార్యక్రమాన్ని నిరంతరం నిర్వహిస్తున్న ఆలయ కమిటీ సభ్యులు, నిత్య అన్నదాన ట్రస్ట్ సభ్యులను అభినందించారు.

సరైన భోజన వసతులు అందుబాటులో లేక దీక్షలు చేపట్టలేని భక్తులకు ఈ 41 రోజుల ఉచిత ప్రసాద వితరణ కార్యక్రమం ఒక గొప్ప అవకాశమని పేర్కొన్నారు. అయ్యప్ప మాల, భవాని మాల, శివ మాల ధరించిన భక్తులందరూ ఈ సదవకాశాన్ని సద్వినియోగం చేసుకోవాలని కోరారు.

పంచముఖ ఆంజనేయస్వామి ఆలయం అనగానే నిత్య అన్నదాన కార్యక్రమానికి కేంద్ర బిందువుగా గుర్తింపు పొందడం ఆనందంగా ఉందన్నారు. విజయనగర పట్టణంలో నిర్వహించే దైవ కార్యక్రమాలకు, అన్నదాన కార్యక్రమాలకు తమ వంతు సహాయ సహకారాలు ఎల్లప్పుడూ ఉంటాయని స్పష్టం చేశారు. అదే విధంగా రానున్న రోజుల్లో నూతన తరం కూడా అన్నదాన ట్రస్ట్ కార్యక్రమాల్లో భాగస్వాములై సేవా కార్యక్రమాలను మరింత ముందుకు తీసుకెళ్లాలని పిలుపునిచ్చారు.

ఈ కార్యక్రమంలో పెంటపాటి కామరాజు, కంది మురళి నాయుడు, బండారి చంద్రశేఖర్, పంచముఖ ఆంజనేయస్వామి ఆలయ కమిటీ సభ్యులు, నిత్య అన్నదాన ట్రస్ట్ సభ్యులు పాల్గొన్నారు.

శ్రీనివాస్ బ్యూరో విజయనగరం