బాలికల సమీకృత వసతి గృహాన్ని జడ్జి ఆకస్మిక తనిఖీ

కనిగిరి ,మేజర్ న్యూస్ :పట్టణంలోని సాంఘిక సంక్షేమ శాఖ సమీకృత బాలికల వసతి గృహాన్ని మండల న్యాయ సేవాధికార సంస్థ చైర్మన్, జడ్జి బి.రూపశ్రీ సోమవారం ఆకస్మికంగా తనిఖీ చేశారు.ఈ సందర్భంగా వసతి గృహంలోని వంటశాల,వసతి గదులను పరిశీలించారు.వసతి గృహంలో విద్యార్థినులకు కల్పిస్తున్న మౌలిక సదుపాయాలు,పౌష్టికాహార పంపిణీ తదితర అంశాలపై విద్యార్థినులతో నేరుగా మాట్లాడి వివరాలు తెలుసుకున్నారు.అనంతరం విద్యార్థినులకు చట్టాలపై ప్రాథమిక అవగాహన కలిగి ఉండాలని సూచించారు.ప్రస్తుత కాలంలో సోషల్ మీడియా వినియోగం పెరుగుతున్న నేపథ్యంలో దాని వల్ల కలిగే ప్రయోజనాలతో పాటు సైబర్ మోసాలు, ఆన్‌లైన్ వేధింపులు వంటి ముప్పుల పట్ల అప్రమత్తంగా ఉండాలన్నారు .విద్యార్థినులకు ఏవైనా సమస్యలు ఎదురైనా, అత్యవసర న్యాయ సహాయం అవసరమైనా న్యాయ సేవాధికార సంస్థను సంప్రదించాలని సూచించారు.ఈ కార్యక్రమంలో న్యాయ సేవాధికార సంస్థ సిబ్బంది పాల్గొన్నారు.