పోగొట్టుకున్న ఫోన్‌ను బాధితుడికి అప్పగింత
నవాబుపేట సూర్య న్యూస్: పోగొట్టుకున్న మొబైల్ ఫోన్‌ను సాంకేతిక పరిజ్ఞానం సహాయంతో గుర్తించి బాధితుడికి అప్పగించినట్లు ఎస్సై నరేందర్ తెలిపారు.ఆయన తెలిపిన వివరాల ప్రకారం..నవాబుపేట మండలం రేకులచౌడాపూర్ గ్రామానికి చెందిన కె.మనోహర్,2024 ఆగస్టు 25న గ్రామం నుంచి మహబూబ్‌నగర్‌కు ద్విచక్ర వాహనంపై కూలీ పనికి వెళ్తుండగా మార్గమధ్యలో తన మొబైల్ ఫోన్‌ను పోగొట్టుకున్నాడు.సుమారు రూ.25వేల విలువైన ఫోన్ పోవడంతో వెంటనే నవాబుపేట పోలీస్‌స్టేషన్‌లో ఫిర్యాదు చేశాడు.ఈ మేరకు పోలీసులు కేంద్ర పరికరాల గుర్తింపు నమోదు విధానం (సీఈఐఆర్)ద్వారా ఫోన్‌ను గుర్తించేందుకు చర్యలు చేపట్టారు.హైదరాబాద్‌లో ఫోన్‌ను గుర్తించి,శనివారం బాధితుడు మనోహర్‌కు తిరిగి అప్పగించారు.ఈ సందర్భంగా ఎస్సై మాట్లాడుతూ..ఎవరైనా తమ మొబైల్ ఫోన్‌ను పోగొట్టుకున్నా,దొంగతనానికి గురైనా వెంటనే పోలీస్‌స్టేషన్‌లో ఫిర్యాదు చేయడంతో పాటు కేంద్ర పరికరాల గుర్తింపు నమోదు పోర్టల్‌లో ఫోన్ వివరాలను నమోదు చేసుకోవాలని సూచించారు.ప్రజలు ఈ అవకాశాన్ని సద్వినియోగం చేసుకోవాలని కోరారు.
