ఫ్రెండ్లీ పోలీసింగ్‌కు నిదర్శనం ఎస్సై బాలరాజు
రామాయంపేట;పోలీస్ స్టేషన్‌కు వెళ్లాలంటే భయపడే పరిస్థితిని మార్చి, ప్రజలు తమకు ఎదురయ్యే చిన్నచిన్న సమస్యలను సైతం ధైర్యంగా పోలీసుల దృష్టికి తీసుకెళ్లేలా స్నేహపూర్వక వాతావరణాన్ని కల్పించిన అధికారి ఎస్సై బాలరాజు అని రామాయంపేట ప్రెస్ క్లబ్ (టి యు డబ్ల్యూ జే) అధ్యక్షుడు బసన్నపల్లి మల్లేశం అన్నారు. రామాయంపేట పోలీస్ స్టేషన్‌లో ఎస్సైగా 27 నెలల పాటు విధులు నిర్వహించిన బాలరాజు తనదైన పని తీరుతో ప్రజలకు చేరువయ్యారని పేర్కొన్నారు. అధికారులకు బదిలీలు సాధారణమే అయిన, ఇలాంటి అధికారి బదిలీపై బాధాకరమని అన్నారు.గతంలో ఏదైనా సమస్య ఎదురైతే పోలీస్ స్టేషన్‌కు వెళ్లాలా? పోలీసులకు చెబితే ఎలా స్పందిస్తారో? అనే సందేహాలు, భయాలు కొంతమందిలో ఉండేవని మల్లేశం అన్నారు. అయితే ఎస్సై బాలరాజు రామాయంపేటలో బాధ్యతలు చేపట్టిన తర్వాత ప్రజలు తమ సమస్యలను నేరుగా పోలీస్ స్టేషన్‌కు వెళ్లి చెప్పుకునే పరిస్థితి ఏర్పడిందని తెలిపారు. చిన్న సమస్య అయినా నిర్లక్ష్యం చేయకుండా పోలీసుల దృష్టికి తీసుకెళ్లాలనే నమ్మకాన్ని ప్రజల్లో కల్పించడం ఫ్రెండ్లీ పోలీసింగ్‌కు నిదర్శనమని కొనియాడారు.పోలీసులు అంటే కేవలం నేరాలను అరికట్టడం, కేసులు నమోదు చేయడం మాత్రమే కాకుండా ప్రజలకు భరోసా కల్పించడం, బాధితులకు అండగా నిలవడం, సమస్యలను శాంతియుతంగా పరిష్కరించే దిశగా కృషి చేయడం కూడా ముఖ్యమని పేర్కొన్నారు. ఈ విషయంలో బాలరాజు ప్రజలతో మమేకమవుతూ, అందరితో స్నేహపూర్వకంగా వ్యవహరించారని అన్నారు.ప్రజలు పోలీస్ స్టేషన్‌ను తమ సమస్యలు చెప్పుకునే వేదికగా భావించేలా చేయడం, పోలీసుల పట్ల ఉన్న భయాన్ని తగ్గించి నమ్మకాన్ని పెంపొందించడం అభినందనీయమన్నారు. 27 నెలల పాటు రామాయంపేటలో ఆయన అందించిన సేవలు ప్రజలకు గుర్తుండిపోతాయని, విధి నిర్వహణలో ఆయన చూపిన చొరవ, ప్రజలతో కొనసాగించిన సత్సంబంధాలు మరువలేనివని బసన్నపల్లి మల్లేశం పేర్కొన్నారు. ప్రజలకు పోలీస్ శాఖపై మరింత విశ్వాసం కలిగించేలా ఫ్రెండ్లీ పోలీసింగ్ విధానాన్ని కొనసాగించడం అవసరమని, బాలరాజు వంటి అధికారులు ప్రజలకు అందుబాటులో ఉంటూ సేవలందించడం సమాజానికి ఎంతో మేలు చేస్తుందని ఆయన అభిప్రాయపడ్డారు. ఈ కార్యక్రమంలో టి యు డబ్ల్యూ జే జిల్లా ఉపాధ్యక్షుడు పాతూరి రమేష్ గౌడ్, రామాయంపేట ప్రెస్ క్లబ్ (టి యు డబ్ల్యూ జే) ఉపాధ్యక్షులు తుజాల శ్రీనివాస గౌడ్, కర్రె నరేందర్, కోశాధికారి రంగా రాజకిషన్, సభ్యులు బల్ల యాదగిరి, తుడుం పెంటయ్య, సార్గు నర్సింలు తో పాటు పలువురు ఉన్నారు.
