పోలింగ్ ఏర్పాట్లపై ఎన్నికల పరిశీలకుడి ప్రత్యేక దృష్టి

మాకవరపాలెం, నవంబర్ 4,మేజర్ న్యూస్:

మాకవరపాలెం మండలంలో ఎంపీటీసీ, జడ్పీటీసీ ఎన్నికల పోలింగ్ నిర్వహణకు సంబంధించి చేపట్టిన ఏర్పాట్లను జిల్లా ఎన్నికల పరిశీలకుడు రోణంకి గోపాలకృష్ణ బుధవారం పరిశీలించారు. మండలంలోని హైస్కూల్‌లో ఏర్పాటు చేసిన పోలింగ్ సామగ్రి పంపిణీ (డిస్ట్రిబ్యూషన్) కేంద్రాన్ని సందర్శించి అక్కడి ఏర్పాట్లను క్షుణ్ణంగా తనిఖీ చేశారు. ఎన్నికల విధులకు హాజరైన సిబ్బందికి బ్యాలెట్ బాక్సులు, బ్యాలెట్ పత్రాలు, ఇతర పోలింగ్ సామగ్రి పంపిణీ చేసే విధానాన్ని పరిశీలించారు. పోలింగ్ కేంద్రాలకు అవసరమైన సామగ్రిని తరలించేందుకు చేపట్టిన ఏర్పాట్లు, సిబ్బందికి కల్పిస్తున్న సౌకర్యాలపై సంబంధిత అధికారులను అడిగి వివరాలు తెలుసుకున్నారు.
ఈ సందర్భంగా ఎన్నికల పరిశీలకుడు మాట్లాడుతూ పోలింగ్ ప్రక్రియలో ఎలాంటి అవాంతరాలు తలెత్తకుండా అధికారులు ముందస్తు జాగ్రత్తలు తీసుకోవాలని సూచించారు. ఎన్నికల సామగ్రి పంపిణీ నుంచి పోలింగ్ ముగిసే వరకు ప్రతి అంశంలో అప్రమత్తంగా వ్యవహరించాలని, ఎన్నికల నిబంధనలను కచ్చితంగా పాటిస్తూ పోలింగ్ ప్రక్రియను ప్రశాంతంగా, పారదర్శకంగా నిర్వహించేలా అన్ని ఏర్పాట్లు పక్కాగా పూర్తి చేయాలని అధికారులను ఆదేశించారు.