ఎన్టీఆర్‌లో పోలింగ్ ప్రశాంతం.. 992 కేంద్రాల్లో జెడ్పీటీసీ, ఎంపీటీసీ ఎన్నికల ప్రక్రియ పూర్తి
విజయవాడ మేజర్ న్యూస్ : ఎన్టీఆర్ జిల్లావ్యాప్తంగా గురువారం నిర్వహించిన జెడ్పీటీసీ, ఎంపీటీసీ ఎన్నికల పోలింగ్ ప్రశాంతంగా ముగిసింది. ఉదయం 7 గంటలకు ప్రారంభమైన పోలింగ్ సాయంత్రం 5 గంటల వరకు కొనసాగింది. మహిళలు, యువత, వృద్ధులు పెద్ద సంఖ్యలో తరలివచ్చి ఓటు హక్కును వినియోగించుకున్నారు. జిల్లాలోని 992 పోలింగ్ కేంద్రాల్లో 5,200 మందికి పైగా ఎన్నికల సిబ్బంది విధులు నిర్వహించగా, సమస్యాత్మక కేంద్రాలతో పాటు మొత్తం 496 కేంద్రాల్లో వెబ్‌కాస్టింగ్, సీసీటీవీల ద్వారా జిల్లా కేంద్రంలోని కమాండ్ కంట్రోల్ రూమ్ నుంచి నిరంతర పర్యవేక్షణ చేపట్టారు. విజయవాడ, నందిగామ, తిరువూరు డివిజన్లలో జిల్లా కలెక్టర్ డాక్టర్ జి. లక్ష్మీశ పర్యటించి బోడపాడు, వెలగలేరు, పుల్లూరు, పరిటాల, రామచంద్రాపురం తదితర ప్రాంతాల్లోని పోలింగ్ కేంద్రాలను పరిశీలించారు. నున్న మండలం బోడపాడు ఆర్సీఎం పాఠశాల కేంద్రంలో ఓటర్లతో మాట్లాడి సౌకర్యాలపై ఆరా తీశారు. ఓటర్లకు తాగునీరు, నీడ, క్యూలైన్లతో పాటు వృద్ధులు, దివ్యాంగుల కోసం వీల్‌చైర్లు, సహాయక సిబ్బందిని అందుబాటులో ఉంచారు. ఎన్‌ఎస్‌ఎస్ వాలంటీర్లు కూడా ఓటర్లకు సహకరించారు. మైలవరం మండలం పొందుగుల శివారు అనంతవరం పోలింగ్ కేంద్రంలో 84 ఏళ్ల గిరిజన మహిళ బాణావతు జంకా ఉత్సాహంగా ఓటు హక్కును వినియోగించుకున్నారు. క్యూలైన్లలో ఉన్న ఓటర్లకు నిబంధనల ప్రకారం టోకెన్లు జారీ చేసి ఓటు వేసే అవకాశం కల్పించారు. పటిష్ట భద్రతా ఏర్పాట్లతో ఎలాంటి అవాంఛనీయ సంఘటనలు చోటుచేసుకోకుండా పోలింగ్ ముగిసింది. అనంతరం బ్యాలెట్ బాక్సులను రాజకీయ పార్టీల ప్రతినిధుల సమక్షంలో సీల్ చేసి, భద్రత మధ్య స్ట్రాంగ్ రూమ్‌లకు తరలించే ప్రక్రియ చేపట్టారు. ఎన్నికల నిర్వహణకు సహకరించిన సిబ్బంది, పోలీసు అధికారులు, మీడియా ప్రతినిధులు, ఓటర్లకు కలెక్టర్ కృతజ్ఞతలు తెలిపారు.
స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.
