లీజులు, లైసెన్సుల నిర్వహణలో నిర్లక్ష్యం వహిస్తే చర్యలు

ఇంద్రకీలాద్రి మేజర్ న్యూస్ : దుర్గా మల్లేశ్వర స్వామివార్ల దేవస్థానంలోని వివిధ లీజులు, లైసెన్సులు, భక్తులకు కల్పిస్తున్న సేవా సౌకర్యాలపై గురువారం పరిపాలనా భవనంలో సమీక్షా సమావేశం నిర్వహించారు. దేవస్థానం కార్యనిర్వహణాధికారి వి.కె. శీనా నాయక్ అధ్యక్షతన జరిగిన ఈ సమావేశంలో సంబంధిత విభాగాల అధికారులు రంగారావు, లక్ష్మీ ప్రసన్న, రమేష్ బాబు తదితరులు పాల్గొన్నారు. ఈ సందర్భంగా ఈవో మాట్లాడుతూ దేవస్థాన పరిధిలోని లీజుదారులు, లైసెన్సుదారులు ఆలయ నిబంధనలను తప్పనిసరిగా పాటించాలని స్పష్టం చేశారు. దుకాణాలు, సేవా కేంద్రాల్లో భక్తులకు నాణ్యమైన సేవలను నిర్ణీత ధరలకే అందించాలని, అధిక ధరలు వసూలు చేయకుండా అధికారులు నిరంతరం తనిఖీలు చేపట్టాలని ఆదేశించారు. వివిధ లీజుల రుసుముల వసూలులో నిర్లక్ష్యం చేయకుండా బకాయిలను సకాలంలో వసూలు చేయాలని సూచించారు. నిబంధనలు ఉల్లంఘించే వారిపై కఠిన చర్యలు తీసుకుంటామని హెచ్చరించారు. భక్తుల లగేజీ కేంద్రాలు, చెప్పుల భద్రతా కేంద్రాల్లో ఎలాంటి ఇబ్బందులు తలెత్తకుండా నిరంతరం పర్యవేక్షించాలని తెలిపారు. రానున్న కార్తీక మాసం, భవానీ దీక్షల రద్దీని దృష్టిలో ఉంచుకుని అన్ని విభాగాల పనితీరును మెరుగుపరచాలని, భక్తులకు మెరుగైన మౌలిక వసతులు, సేవలు అందేలా అధికారులు సమన్వయంతో పనిచేయాలని ఆదేశించారు. ప్రతి భక్తుడు సంతృప్తికరమైన ఆధ్యాత్మిక అనుభూతితో తిరిగి వెళ్లేలా చర్యలు తీసుకోవాలని ఈవో సూచించారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.