గొర్తి శ్రీనివాస్ ఆత్మహత్యపై సమగ్ర విచారణ జరిపి బాధ్యులపై చర్యలు తీసుకోవాలి

విజయవాడ మేజర్ న్యూస్ : బ్రాహ్మణ కో-ఆపరేటివ్ క్రెడిట్ సొసైటీ విజయవాడ శాఖ మేనేజర్ గొర్తి శ్రీనివాస్ ఆత్మహత్యపై సమగ్ర విచారణ జరిపి బాధ్యులపై చర్యలు తీసుకోవాలని ఆంధ్రప్రదేశ్ పౌరోహిత బ్రాహ్మణ సమాఖ్య ప్రభుత్వాన్ని కోరింది. ఈ మేరకు సమాఖ్య తాత్కాలిక కమిటీ ఛైర్మన్ మేడవరపు లక్ష్మణరావు, గౌరవాధ్యక్షుడు యామిజాల నరసింహమూర్తి ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్, మంత్రి నారా లోకేష్, హోంమంత్రి వంగలపూడి అనితకు ఈమెయిల్ ద్వారా లేఖ పంపినట్లు తెలిపారు. శ్రీనివాస్ మరణ వాంగ్మూలంలో ప్రస్తావించిన వ్యక్తులపై సమగ్ర విచారణ జరపాలని, ఆరోపణలు ఎదుర్కొంటున్న వారిని విధుల నుంచి తప్పించి విచారణ పూర్తిచేయాలని డిమాండ్ చేశారు. కార్పొరేషన్ ఛైర్మన్ బుచ్చి రాంప్రసాద్‌ను పదవి నుంచి తొలగించాలని, సీఈవో గుళ్లపల్లి నాగసాయిపై చర్యలు తీసుకోవాలని కోరారు. శ్రీనివాస్ కుటుంబానికి రక్షణ కల్పించడంతో పాటు రూ.5 కోట్ల ఆర్థిక సాయం అందించాలని విజ్ఞప్తి చేశారు. ప్రభుత్వం తక్షణమే స్పందించి అధికారిక ప్రకటన చేయకపోతే బ్రాహ్మణ సంఘాల ఆధ్వర్యంలో అమరావతిలో ఉద్యమం చేపడతామని హెచ్చరించినట్లు తెలిపారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.