ప్రజల నమ్మకాన్ని నిలబెట్టుకుంటూ ఉయ్యూరు అభివృద్ధికి కృషి చేయాలి

ఉయ్యూరు మేజర్ న్యూస్ : ఉయ్యూరు మున్సిపల్ చైర్మన్‌గా విజయం సాధించిన చెదుర్తిపాటి ప్రవీణ్ కుమార్ కుటుంబ సమేతంగా గురువారం తెలుగుదేశం పార్టీ జాతీయ ఉపాధ్యక్షుడు వై.వీ.బీ. రాజేంద్రప్రసాద్ దంపతులను వారి స్వగృహంలో మర్యాదపూర్వకంగా కలిసి కృతజ్ఞతలు తెలిపారు. ఈ సందర్భంగా రాజేంద్రప్రసాద్ దంపతులను శాలువాతో సత్కరించి ఆశీర్వాదం తీసుకున్నారు. తన రాజకీయ గురువు వై.వీ.బీ. రాజేంద్రప్రసాద్ అని, రాజకీయాల్లో తొలి అడుగుల నుంచి ఆయన వద్దే ఓనమాలు నేర్చుకున్నానని ప్రవీణ్ కుమార్ తెలిపారు. ప్రతి సందర్భంలోనూ తనకు మార్గదర్శనం చేస్తూ ప్రోత్సహించిన ఆయనకు ఎప్పటికీ రుణపడి ఉంటానని, ఆయన ఆశయాలకు అనుగుణంగా ప్రజలకు సేవ చేస్తూ ఉయ్యూరు పట్టణ అభివృద్ధికి కృషి చేస్తానని పేర్కొన్నారు. ప్రజలు తనపై ఉంచిన నమ్మకాన్ని వమ్ము చేయనని అన్నారు. ఈ సందర్భంగా ప్రవీణ్ కుమార్ దంపతులను రాజేంద్రప్రసాద్ దంపతులు శాలువాతో సత్కరించి అభినందించారు. చైర్మన్ పదవి కేవలం హోదా మాత్రమే కాదని, ప్రజలకు సేవ చేసే గొప్ప బాధ్యత అని రాజేంద్రప్రసాద్ పేర్కొన్నారు. ప్రతి వార్డులో ప్రజల సమస్యలను తెలుసుకుంటూ, కౌన్సిలర్ల సమన్వయంతో పట్టణ అభివృద్ధికి అంకితభావంతో పనిచేయాలని సూచించారు. భవిష్యత్తులో మరింత ఉన్నత స్థాయికి ఎదగాలని ఆకాంక్షించారు. ఈ కార్యక్రమంలో మాజీ సర్పంచ్ యలమంచిలి భ్రమరాంబ, ప్రవీణ్ కుమార్ సతీమణి చెదుర్తిపాటి శ్యామల తదితరులు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, పెనమలూరు నియోజకవర్గం, కృష్ణాజిల్లా.