పేదల సొంతింటి కలను నెరవేరుస్తున్న ప్రజా ప్రభుత్వం: స్పీకర్ గడ్డం ప్రసాద్ కుమార్

వికారాబాద్, మేజర్ న్యూస్: నిరుపేదల సొంతింటి కలను ప్రజా ప్రభుత్వం ఇందిరమ్మ ఇళ్ల పథకం ద్వారా నెరవేరుస్తోందని తెలంగాణ శాసనసభ సభాపతి, వికారాబాద్ ఎమ్మెల్యే గడ్డం ప్రసాద్ కుమార్ అన్నారు. అర్హులైన ప్రతి పేద కుటుంబానికి గౌరవప్రదమైన సొంతింటిని అందించడమే ప్రభుత్వ లక్ష్యమని పేర్కొన్నారు. ఇందిరమ్మ ఇళ్లు పేదల ఆత్మగౌరవానికి ప్రతీకలని, పేదల సంక్షేమం కోసం ప్రజా ప్రభుత్వం నిరంతరం కృషి చేస్తోందని తెలిపారు.శుక్రవారం వికారాబాద్ పట్టణంలోని బూరుగుపల్లిలో కావలి రాంచంద్రయ్య ముదిరాజ్, లక్ష్మి దంపతుల ఇందిరమ్మ ఇంటి గృహప్రవేశ కార్యక్రమానికి స్పీకర్ గడ్డం ప్రసాద్ కుమార్ ముఖ్య అతిథిగా హాజరయ్యారు. ఈ సందర్భంగా నూతన గృహంలోకి ప్రవేశించిన రాంచంద్రయ్య కుటుంబ సభ్యులకు శుభాకాంక్షలు తెలియజేశారు. కొత్త ఇంటిలో సుఖసంతోషాలతో, ఆయురారోగ్యాలతో జీవించాలని ఆకాంక్షించారు.అంతకుముందు స్పీకర్‌కు రాంచంద్రయ్య కుటుంబ సభ్యులు ఘన స్వాగతం పలికి సత్కరించారు. ఈ కార్యక్రమంలో గ్రామ ప్రజలు, కుటుంబ సభ్యులు, బంధుమిత్రులు, నాయకులు, కార్యకర్తలు తదితరులు పాల్గొన్నారు.