నీటిని పొదుపుగా వాడటం ప్రతి ఒక్కరి బాధ్యత
మునగాల మేజర్ న్యూస్, మునగాల :తెలంగాణ రాష్ట్ర ప్రభుత్వ ఉత్తర్వుల మేరకు పీఎం శ్రీ తెలంగాణ మోడల్ స్కూల్ మునగాల నందు జల సంరక్షణ, ప్రపంచ బాలల హక్కుల పరిరక్షణ ప్రతిజ్ఞ కార్యక్రమం శుక్రవారం నిర్వహించారు.
ఈ సందర్భంగా ఇన్చార్జి ప్రిన్సిపాల్ డా. జె. రామకృష్ణ మాట్లాడుతూ నీటిని పొదుపుగా వాడటం ప్రతి ఒక్కరి బాధ్యత అన్నారు. నీరు లేనిదే జీవనం లేదని, నీటిని వృథా చేయడం అంటే భవిష్యత్ తరాలకు అన్యాయం చేయడమేనని తెలిపారు. విద్యార్థులు చిన్న వయసు నుంచే నీటి విలువను తెలుసుకొని, ఇంట్లో, పాఠశాలలో నీటిని జాగ్రత్తగా వాడాలని సూచించారు.
అలాగే ప్రతి బిడ్డకు విద్య, ఆరోగ్యం, రక్షణ పొందే హక్కు ఉందని, బాలల హక్కులను కాపాడటం సమాజంలోని ప్రతి ఒక్కరి కర్తవ్యమని ఆయన అన్నారు. బాలలపై ఎలాంటి వేధింపులు, వివక్ష ఉండకూడదని, పిల్లలను ప్రేమతో, గౌరవంతో చూడాలని పిలుపునిచ్చారు.
అనంతరం విద్యార్థులు, ఉపాధ్యాయులు జల సంరక్షణ మరియు బాలల హక్కుల పరిరక్షణపై ప్రతిజ్ఞ చేశారు.
ఈ కార్యక్రమంలో జాకీర్, రవీందర్ రెడ్డి, వెంకటేశ్వర్ల రావు, బి. సైదులు గౌడ్, వాణి, సుబ్రహ్మణ్యం, రంజాన్ బి, పీడీ, జానీ పాషా, రమేష్, ఇతర ఉపాధ్యాయులు, విద్యార్థులు పాల్గొన్నారు.