మియాపూర్ భూములు పరిశీలించిన రంగారెడ్డి కలెక్టర్ నారాయణ రెడ్డి

శేరిలింగంపల్లి,మేజర్ న్యూస్ :  మియాపూర్ లోని  550 ఎకరాలు ప్రభుత్వానికే చెందుతుందని సుప్రీం కోర్టు తీర్పుతో భూముల స్వాధీన ప్రక్రియ ప్రారంభించింది ప్రభుత్వం. శుక్రవారం  రంగారెడ్డి జిల్లా కలెక్టర్ నారాయణరెడ్డి భూముల స్వాధీన ప్రక్రియను పర్యవేక్షించారు. మియాపూర్ లోని550 ఎకరాల భూమి  హెఎండీఏ ఆధీనంలో ఉందని కలెక్టర్ నారాయణరెడ్డి చెప్పారు. ఈ భూములకు ఇప్పటికే ఫెన్సింగ్ వేసుకున్నట్లు తెలిపారు. మొత్తం 550లో 400 ఎకరాల వేకెంట్ ల్యాండ్ ఉందన్నారు. ప్రస్తుతం వేకెంట్ ల్యాండ్ స్వాధీనం చేసుకుంటున్నట్లు చెప్పారు. సెటిల్మెంట్ రికార్డుల్లో సర్కార్ పోరంబోకు భూమి అని తేలిందని.. పహాణీలో కొందరు ప్రైవేటు వ్యక్తుల పేర్లు ఉన్నాయని తెలిపారు. విలువైన భూములను కాపాడుకున్నామని అన్నారు. ఈ ల్యాండ్ విలువ 50 వేల కోట్ల రూపాయల వరకు ఉంటుందని చెప్పారు.  సీఎం సూచనలతో విలువైన భూములు కాపాడామని కలెక్టర్ నారాయణరెడ్డి తెలిపారు. అన్ని రికార్డులు సమర్పించడం వల్లే ప్రభుత్వ పరమైందని వెల్లడించారు.550 ఎకరాలకుగాను 400ఎకరాల భూమికి మాత్రమే ఫెన్సింగ్ ఉందన్న కలెక్టర్‌ మిగిలిన భూమికి కూడా కంచె వేస్తామని వెల్లడించారు. ప్రస్తుతం ఈ భూమి విలువ దాదాపు 50 వేల కోట్లు ఉంటుందని ప్రభుత్వం ఇచ్చే తదుపరి ఆదేశాలపై చర్యలు ఉంటాయని స్పష్టం చేశారు. 550ఎకరాలను గుర్తిస్తామని అయితే వంద ఎకరాల వరకు భూమిలో నిరుపేదలు ఉంటున్నారని ఇప్పటికైతే వారి జోలికి వెళ్లమని కలెక్టర్‌ స్పష్టం చేశారు.