telangana
మీనాక్షి నటరాజన్ సేవలు మరువలేని: టీపీసీసీ అధ్యక్షుడు మహేష్ కుమార్ గౌడ్
సూర్య, తెలంగాణ బ్యూరో ప్రతినిధి
: ఏఐసీసీ తెలంగాణ నూతన ఇన్ఛార్జిగా నియమితులైన బి.ఎం. సందీప్ రాజకీయ అనుభవం, నాయకత్వ లక్షణాలు కాంగ్రెస్ పార్టీకి మరింత బలాన్ని చేకూరుస్తాయని టీపీసీసీ అధ్యక్షుడు, ఎమ్మెల్సీ మహేష్ కుమార్ గౌడ్ అన్నారు. చిక్మగళూరులో జన్మించిన బి.ఎం. సందీప్ చిన్నతనం నుంచే రాజకీయాల్లోకి వచ్చారని, తన రాజకీయ ప్రస్థానంలో అనేక కీలక పదవులు చేపట్టి విశేష అనుభవాన్ని సంపాదించారని తెలిపారు. ఎం.బి. పాటిల్, రమేష్ చెన్నితల వంటి నాయకుల ఆధ్వర్యంలో పనిచేసిన అనుభవం ఆయనకు ఉందన్నారు.
తెలంగాణలో ఏడాది పాటు ఇన్ఛార్జిగా పనిచేసిన మీనాక్షి నటరాజన్ పార్టీపై తనదైన ప్రత్యేక ముద్ర వేశారని మహేష్ కుమార్ గౌడ్ కొనియాడారు. అణగారిన వర్గాలకు అండగా నిలిచేందుకు ఆమె విశేష కృషి చేశారని పేర్కొన్నారు. ఆమె నాయకత్వంలో జరిగిన స్థానిక సంస్థల ఎన్నికలు, జూబ్లీహిల్స్ ఉప ఎన్నిక, మున్సిపల్ ఎన్నికల్లో కాంగ్రెస్ పార్టీ తన సత్తా చాటిందని తెలిపారు. తెలంగాణ కాంగ్రెస్కు అందించిన సేవలకు మీనాక్షి నటరాజన్కు మనస్ఫూర్తిగా ధన్యవాదాలు తెలియజేశారు.
రాష్ట్రంలో ఎల్నినో ప్రభావంతో తీవ్ర కరువు పరిస్థితులు ఏర్పడే అవకాశం ఉందని, ఈ అంశంపై ముఖ్యమంత్రి రేవంత్ రెడ్డి ఎప్పటికప్పుడు అప్రమత్తంగా ఉంటూ అవసరమైన చర్యలపై దృష్టి సారించారని చెప్పారు. అయితే కరువు ముప్పు ఎదుర్కొనేందుకు కేంద్ర ప్రభుత్వం నుంచి ఆశించిన స్థాయిలో ఎలాంటి సహకారం అందడం లేదని విమర్శించారు.
ఓటర్ల జాబితా ప్రత్యేక సమగ్ర సవరణ (ఎస్ఐఆర్)కు వ్యతిరేకంగా ముఖ్యమంత్రి రేవంత్ రెడ్డి నాయకత్వంలో కాంగ్రెస్ పార్టీ భారీ ర్యాలీలు నిర్వహించిందని మహేష్ కుమార్ గౌడ్ తెలిపారు. ఢిల్లీలోని రామ్లీలా మైదానంలో నిర్వహించిన భారీ ర్యాలీకి తెలంగాణ నుంచి కాంగ్రెస్ నాయకులు, కార్యకర్తలు పెద్ద సంఖ్యలో తరలివచ్చి పార్టీ పోరాటానికి సంఘీభావం తెలిపారని పేర్కొన్నారు. ప్రజాస్వామ్య హక్కుల పరిరక్షణ కోసం కాంగ్రెస్ పార్టీ నిరంతరం పోరాడుతుందని స్పష్టం చేశారు.
ఏ రవీందర్, హైదరాబాద్.