కోటా రోడ్డు ప్రమాదంలో తొమ్మిది మంది మృతి
సూర్య జాతీయ డెస్క్: రాజస్థాన్ రాష్ట్రంలోని కోటా జిల్లాలో జరిగిన ఘోర రోడ్డు ప్రమాదంలో తొమ్మిది మంది ప్రాణాలు కోల్పోవడంపై రాష్ట్రపతి ద్రౌపది ముర్ము తీవ్ర విచారం వ్యక్తం చేశారు. ఆదివారం ఎక్స్ వేదికగా స్పందించిన ఆమె, ఈ ప్రమాద ఘటన అత్యంత విషాదకరమని పేర్కొంటూ మృతుల కుటుంబ సభ్యులకు తన ప్రగాఢ సానుభూతిని తెలియజేశారు. క్షతగాత్రులు త్వరగా కోలుకోవాలని ఆకాంక్షించారు.
శనివారం అర్థరాత్రి దాటిన తర్వాత కోటా-ఉదయ్పూర్ జాతీయ రహదారిపై శంభుపుర సమీపంలో ఈ దుర్ఘటన చోటుచేసుకుంది. యాత్రికులతో ప్రయాణిస్తున్న వాహనం, రోడ్డు పక్కన నిలిపి ఉన్న లారీని బలంగా ఢీకొట్టడంతో కనీసం తొమ్మిది మంది అక్కడికక్కడే మరణించగా, పలువురు తీవ్రంగా గాయపడ్డారు. ఖాటు శ్యామ్ ఆలయ దర్శనం ముగించుకుని తిరుగు ప్రయాణమైన వాహనంలో మొత్తం 16 మంది ఉన్నారని, వారంతా ఒకే కుటుంబానికి చెందిన వారని అదనపు జిల్లా కలెక్టర్ రాజేష్ జోషి వెల్లడించారు.
ఘటన సమాచారం అందిన వెంటనే సహాయక చర్యలు చేపట్టినట్లు అధికారులు తెలిపారు. గాయపడిన వారికి మెరుగైన వైద్య చికిత్స అందించడమే తమ తక్షణ ప్రాధాన్యత అని, మృతదేహాలకు పోస్ట్మార్టం ప్రక్రియ కొనసాగుతోందని అదనపు కలెక్టర్ రాజేష్ జోషి వివరించారు. బాధిత కుటుంబ సభ్యుల్లో ఒకరు తెలిపిన వివరాల ప్రకారం, మొత్తం 36 మంది కుటుంబ సభ్యులు ఖాటు శ్యామ్ నుంచి మధ్యప్రదేశ్లోని ధార్ వైపు మూడు వేర్వేరు వాహనాల్లో బయలుదేరారు. రెండు వాహనాలు వెనుక వస్తుండగా, మూడో వాహనం ముందుకు వెళ్లిన సమయంలో ప్రమాదం గురించి ఫోన్ ద్వారా సమాచారం అందిందని, వెంటనే కుటుంబ సభ్యులు సంఘటనా స్థలానికి చేరుకున్నారని పేర్కొన్నారు.
ఈ ఘోర రోడ్డు ప్రమాదంతో ఆ కుటుంబాలలో తీవ్ర విషాదఛాయలు అలుముకున్నాయి. ఆసుపత్రులలో చికిత్స పొందుతున్న క్షతగాత్రుల ఆరోగ్య పరిస్థితిని వైద్యులు నిరంతరం పర్యవేక్షిస్తున్నారు. పవిత్ర యాత్ర ముగించుకుని తిరిగి వస్తుండగా జరిగిన ఈ ప్రమాదం స్థానికంగా తీవ్ర విషాదాన్ని నింపింది.