లీజ్‌ ఒప్పందం పేరుతో అదనపు నగదు డిమాండ్‌.. మహిళా వ్యాపారికి బెదిరింపులు
ఘట్‌కేసర్‌ రూరల్‌, మేజర్‌ న్యూస్‌: లీజ్‌ ఒప్పందానికి విరుద్ధంగా అదనపు నగదు డిమాండ్‌ చేస్తూ తనను వేధింపులకు, బెదిరింపులకు గురిచేస్తున్నారని జోడిమెట్ల సమీపంలో వొకాస్‌ ఫుడ్‌ కోర్టు ఏర్పాటు చేస్తున్న నిర్వాహకురాలు హరిత గోగినేని ఆరోపించారు. ఫోర్జరీ ఆరోపణలతో తనపై పోలీసులకు ఫిర్యాదు చేయడంతో వ్యాపారం ప్రారంభించకముందే ఇబ్బందులు ఎదుర్కొంటున్నానని ఆవేదన వ్యక్తం చేశారు. ఈ వ్యవహారంపై పోలీసు కమిషనర్‌ను కలిసి ఆధారాలు సమర్పించడంతో పాటు న్యాయం కోసం న్యాయస్థానాన్ని ఆశ్రయించినట్లు తెలిపారు.ఆదివారం విలేకరులతో ఆమె మాట్లాడుతూ.. ఘట్‌కేసర్‌ సర్కిల్‌ పోచారం డివిజన్‌ పరిధిలోని జోడిమెట్ల సమీపంలో జాతీయ రహదారి పక్కన గతంలో రెస్టారెంట్‌ నిర్వహించిన ప్రాంగణంలో ఫుడ్‌ కోర్టు ఏర్పాటు చేయాలని నిర్ణయించుకున్నట్లు తెలిపారు. ఇందుకోసం ఆకిటి మంజుల, ఆమె కుమారుడు ఆకిటి దివాకర్‌రెడ్డికి చెందిన ప్లాట్‌ నంబర్‌ 1ను లీజుకు తీసుకున్నానని, అధికారిక లీజ్‌ డీడ్‌ చేయడంలో జాప్యం జరగడంతో తాత్కాలిక ఒప్పంద పత్రాలు పొందినట్లు వివరించారు. వాటి ఆధారంగా జీఎస్టీ నమోదు, ఆహార భద్రత లైసెన్స్‌ పొందినట్లు పేర్కొన్నారు. ఏప్రిల్‌ నుంచి క్రమం తప్పకుండా అద్దె చెల్లిస్తున్నప్పటికీ ఒప్పందానికి మించి అదనపు నగదు చెల్లించాలని ఒత్తిడి చేస్తున్నారని ఆరోపించారు.అలాగే ప్లాట్‌ నంబర్‌ 2కు సంబంధించి శ్రీనివాస్‌రెడ్డితో నిబంధనల ప్రకారం ఒప్పందం చేసుకున్నట్లు తెలిపారు. అయితే గతంలో రెస్టారెంట్‌ నిర్వహించిన వినయ్‌కుమార్‌తో పాటు మంజుల, దివాకర్‌రెడ్డి, శ్రీనివాస్‌రెడ్డి కలిసి తాను నకిలీ పత్రాలు సృష్టించి జీఎస్టీ, ఫుడ్‌ లైసెన్స్‌ పొందినట్లు పోచారం ఐటీ కారిడార్‌ పోలీసులకు ఫిర్యాదు చేశారని వెల్లడించారు. ఆ ఫిర్యాదుపై పోలీసులు కేసు నమోదు చేసినప్పటికీ, తాను సమర్పించిన ఆధారాలను పరిగణనలోకి తీసుకోకుండా తన ఫిర్యాదుపై తగిన చర్యలు తీసుకోవడం లేదని అసంతృప్తి వ్యక్తం చేశారు.అదనపు డబ్బులు చెల్లించకపోతే ప్రాంగణాన్ని ఖాళీ చేయాలని హెచ్చరిస్తున్నారని, తాను పెట్టిన పెట్టుబడిని తిరిగి ఇవ్వాలని కోరినా స్పందించడం లేదని ఆరోపించారు. ఈ పరిణామాలతో తీవ్ర మానసిక ఆందోళనకు గురవుతున్నానని, తనకు ప్రాణహాని ఉందని ఆవేదన వ్యక్తం చేశారు. పోలీసు కమిషనర్‌ను కలిసి తన వద్ద ఉన్న ఆధారాలు అందజేశానని, న్యాయస్థానంలోనూ కేసు దాఖలు చేసినట్లు తెలిపారు. మహిళా వ్యాపారులను ప్రోత్సహించాల్సిన సమయంలో ఇలాంటి వేధింపులకు గురిచేయడం బాధాకరమని, తన హక్కుల పరిరక్షణ కోసం చట్టపరంగా పోరాటం కొనసాగిస్తానని హరిత గోగినేని స్పష్టం చేశారు.
