సేవ సమాజానికి స్ఫూర్తి...! -విశిష్ట సేవలందించిన వారికి సూర్యచంద్ర ఫౌండేషన్ పురస్కారాలు -అంకితభావంతో పనిచేసే వారికి గుర్తింపునివ్వడం అభినందనీయం : విసి ఉమ

ఎడ్యుకేషన్ స్టాఫ్ రిపోర్టర్ : సేవా గుర్తింపుతో సమాజానికి స్ఫూర్తిగా నిలవడం గర్వకారణమని, వివిధ రంగాలలో అంకితభావంతో పనిచేస్తూ సమాజానికి విశిష్ట సేవలందిస్తున్న వ్యక్తులను గుర్తించి పురస్కారాలతో సత్కరించడం అభినందనీయమని మహిళా వర్సిటీ వీసీ ప్రొఫెసర్ వి.ఉమ పేర్కొన్నారు. ఏనుగు వారి సూర్యచంద్ర ఫౌండేషన్ ఆధ్వర్యంలో పద్మావతి మహిళా విశ్వవిద్యాలయం సావేరి హాల్‌లో వివిధ రంగాలలో విశిష్ట సేవలు అందించిన పలువురు వ్యక్తుల పురస్కార ప్రధానోత్సవం ఆదివారం ఘనంగా నిర్వహించారు. ఈ కార్యక్రమానికి ఆమె ముఖ్యఅతిథిగా హాజరై ఉద్యోగ విరమణ అనంతరం కూడా తనకు ప్రత్యక్ష సంబంధం లేని వివిధ రంగాల్లో సేవలందిస్తున్న వ్యక్తులను గుర్తించి గౌరవించాలనే ఫౌండేషన్ నిర్వాహకుల సంకల్పం ప్రశంసనీయమన్నారు. ప్రస్తుత సమాజంలో ఇటువంటి సేవా కార్యక్రమాలు నిర్వహించడం సాధారణ విషయం కాదని, అందుకే ఈ కార్యక్రమానికి విశ్వవిద్యాలయం వేదికగా నిలిచిందన్నారు. సుమారు 43 ఏళ్లుగా విశ్వవిద్యాలయ రంగంలో పనిచేస్తున్న తనకు వృత్తిపరమైన రంగాల్లో అనేక మార్పులు కనిపించాయని, నేటి రోజుల్లో వృత్తిపట్ల ప్రేమ, నిబద్ధత, అంకితభావంతో పనిచేసే వారి సంఖ్య తగ్గుతుండటం ఆందోళన కలిగిస్తోందన్నారు. ఫౌండేషన్ ఆధ్వర్యంలో మొత్తం 13 విభిన్న రంగాల్లో విశిష్ట సేవలందించిన వ్యక్తులను గుర్తించి, వారి సేవలను క్షుణ్ణంగా పరిశీలించిన అనంతరం అర్హులను పురస్కారాలకు ఎంపిక చేయడం అభినందనీయమన్నారు. ముఖ్యంగా కళాకారులకు తగిన గుర్తింపు, పురస్కారాలు లభించడం అంత సులభం కాదని, అటువంటి కళారంగానికి కూడా ప్రాధాన్యతనిస్తూ ప్రతిభావంతులను సత్కరించడం ఫౌండేషన్ ప్రత్యేకతగా పేర్కొన్నారు. పురస్కార గ్రహీతల్లో విశ్వవిద్యాలయానికి చెందిన సంగీత కళాకారిణి శైలజ రవి, నృత్య కళాకారిణి డాక్టర్ హేమబిందు ఉండటం గర్వకారణమన్నారు. సిమ్స్ డాక్టర్ వనజాక్షి వైద్యసేవలతో పాటు యోగా ద్వారా అందిస్తున్న మార్గదర్శకత్వాన్ని, గంగాధర్ ప్రకృతి వ్యవసాయ రంగంలో చేస్తున్న కృషిని ప్రత్యేకంగా ప్రశంసించారు. అలాగే పోలీస్ సేవలు, అంతర్జాతీయ హాకీ క్రీడాకారిణి రజిని క్రీడారంగానికి అందించిన సేవలను, పత్రికా రంగంలో మద్దినేని చేసిన సేవలను కొనియాడారు. విభిన్న రంగాల్లో ప్రతిభను, సేవానిరతిని గుర్తించి గౌరవించడం ద్వారా మరింత మందికి స్ఫూర్తి కలుగుతుందని పేర్కొన్నారు. ప్రస్తుత కాలంలో కుటుంబ బాధ్యతలకే పరిమితమవుతున్న పరిస్థితుల్లో తన పిల్లల పేరుతో స్వచ్ఛంద సంస్థను స్థాపించి, సమాజంలోని వివిధ వర్గాలకు సేవలందించాలనే లక్ష్యంతో ముందుకు సాగుతున్న ఫౌండేషన్ వ్యవస్థాపక అధ్యక్షుడు ఏనుగు అంకం నాయుడు సంకల్పం ఆదర్శనీయమన్నారు. భవిష్యత్తులో ఆయన పిల్లలు కూడా ఈ సేవా కార్యక్రమాలను కొనసాగిస్తూ సమాజానికి తమ వంతు సహకారం అందించాలని ఆకాంక్షించారు. కళలు, వైద్యం, యోగా, ప్రకృతి వ్యవసాయం, క్రీడారంగ సేవలకు గుర్తింపుని డా.లింగుంట్ల రమేష్ నాథ్ తెలియజేశారు. పురస్కారాలు అందుకున్న వారికి హృదయపూర్వక అభినందనలు తెలియజేశారు. ఆత్మీయ అతిథులుగా జాతీయ సంస్కృత విశ్వవిద్యాలయం ఉపకులపతి డాక్టర్ జి.ఎస్.వి. కృష్ణమూర్తి, ఎస్వీయూ విశ్రాంత ఉపకులపతి డాక్టర్ పి.మురళి, అతిథిగా గుడివాడ నాగరత్నం నాయుడు పాల్గొన్నారు.

సీఎం గౌడ్ తిరుపతి స్టాప్ రిపోర్టర్