డయాబెటిస్‌పై నిర్లక్ష్యం వద్దు..ప్రతి ఒక్కరూ ఆరోగ్యంపై శ్రద్ధ పెట్టాలి ఎమ్మెల్యే గళ్ళా మాధవి

 గుంటూరు న్యూస్ : డయాబెటిస్‌ పై ఏ మాత్రం నిర్లక్ష్యం వహించ వద్దని, చిన్న గాయం కనిపించినా వెంటనే వైద్యులను సంప్రదించాలని లేకపోతే అది కాలు తొలగించుకునే పరిస్థితులు రావచ్చని, కాబట్టి ప్రతి ఒక్కరూ ఆరోగ్యంపై శ్రద్ధ పెట్టాలని గుంటూరు పశ్చిమ నియోజకవర్గ ఎమ్మెల్యే గళ్ళా మాధవి పేర్కొన్నారు. ఆదివారం గుంటూరు కొరిటెపాడు వాకింగ్ ట్రాక్‌లో నిర్వహించిన జాతీయ రక్తనాళాల ఆరోగ్య అవగాహన వాకథాన్ కార్యక్రమంలో గుంటూరు పశ్చిమ నియోజకవర్గ ఎమ్మెల్యే శ్రీమతి గళ్ళా మాధవి, నగర మేయర్ కోవెలమూడి లక్ష్మీ అపర్ణ పాల్గొన్నారు. డయాబెటిస్ కారణంగా కాళ్లు తొలగించాల్సిన పరిస్థితులు రాకుండా ప్రజల్లో అవగాహన కల్పించాలనే లక్ష్యంతో వాస్క్యులర్ సర్జన్లు ఈ కార్యక్రమాన్ని నిర్వహించారు.ఈ సందర్భంగా ఎమ్మెల్యే గళ్ళా మాధవి మాట్లాడుతూకాలు తొలగింపు లేని గుంటూరు,కాలు తొలగింపు లేని భారతదేశం లక్ష్యంగా గుంటూరులోని వాస్క్యులర్ సర్జన్లు చేపట్టిన ఈ అవగాహన కార్యక్రమం అభినందనీయమని, డయాబెటిస్‌తో పాటు అనారోగ్యకరమైన జీవనశైలి, ఆరోగ్యంపై నిర్లక్ష్యం కారణంగా చాలామంది కాళ్లు తొలగించాల్సిన దుస్థితిని ఎదుర్కొంటున్నారని ఎమ్మెల్యే గళ్ళా మాధవి ఆవేదన వ్యక్తం చేశారు.ముఖ్యంగా డయాబెటిస్ ఉన్నవారు కాళ్ల విషయంలో ప్రత్యేక శ్రద్ధ వహించాలని, చిన్న గాయం అయినా, ఏదైనా ఇబ్బంది తలెత్తినా నిర్లక్ష్యం చేయకుండా వెంటనే వైద్యులను, ముఖ్యంగా రక్తనాళాల శస్త్రచికిత్స నిపుణులను సంప్రదించాలని సూచించారు. వ్యాధిని ప్రారంభ దశలోనే గుర్తించకపోవడం కూడా సమస్య తీవ్రతకు కారణమవుతోందని పేర్కొన్నారు.కాలు కోల్పోవడం వల్ల వ్యక్తి తన దైనందిన జీవితంలో ఇతరులపై ఆధారపడాల్సి వస్తుందని, అది వారి ఆత్మగౌరవం, ఆత్మవిశ్వాసంపై ప్రభావం చూపుతుందని అన్నారు. ప్రతి ఒక్కరూ ఆరోగ్యాన్ని మహాభాగ్యంగా భావించి కాపాడుకోవాలని పిలుపునిచ్చారు. ముఖ్యమంత్రి నారా చంద్రబాబు నాయుడు ఆకాంక్షిస్తున్న సంతోషకరమైన, ఆరోగ్యకరమైన, సంపన్నమైన కుటుంబాల నిర్మాణంలో భాగంగా ప్రజలందరూ ఆరోగ్యకరమైన జీవనశైలిని అలవర్చుకోవాలని కోరారు.