కవిత్వం రాయడం ఓ తపస్సు ,అమరావతి సాహితీ మిత్రులు సభలో డా. రావి రంగారావు

గుంటూరు న్యూస్ : కవిత స్పష్టంగా ఉండాలని, మనసులో స్పష్ట చిత్రం పడితేనే అర్థమవుతుందని, భావం వెలువరించే ప్రతి పదం పదునుగా ఉండాలని, అందుకు తగ్గట్టు వాక్య నిర్మాణం సూటిగా ఉండేందుకు కవులు నైపుణ్యాలను మెరుగుపరుచుకోవాలని అమరావతి సాహితీ మిత్రులు వ్యవస్థాపకులు డా. రావి రంగారావు పేర్కొన్నారు. ఆదివారం ఉదయం బ్రాడీపేట సర్వీస్ హెల్త్ ఆర్గనైజేషన్ సమావేశ మందిరంలో జరిగిన అమరావతి సాహితీ మిత్రులు మూడో ఆదివారం సమావేశానికి తమ్మా ధనుంజయ రెడ్డి అధ్యక్షత వహించారు.

ఈ సందర్భంగా విమల సాహితి సంపాదకులు డా. జెల్ది విద్యాధర్ రచించిన "తాజ్ మహల్" కవితల సంపుటిని డా. రావి రంగారావు ఆవిష్కరించి ప్రసంగించారు.డా. రావి రంగారావు ప్రసంగిస్తూ కవితలో ఓ చోట చెప్పిన భావాన్ని మరోచోట చెబితే బిగింపులో పట్టు తగ్గుతుందని, ఓ క్రమ పద్ధతిలో భావాలను వ్యక్తపరిస్తే మనసు ఆలోచనామృతం అవుతుందని తెలిపారు. కవిత్వంతో కలిగే ఆనందాన్ని ప్రతి ఒక్కరూ చవి చూడాలని ఆయన పిలుపు నిచ్చారు. యర్రగుంట్ల పాణిరావు, పింగళి భాగ్యలక్ష్మి గ్రంథ సమీక్ష చేశారు.డా. జెల్ది విద్యాధర్ ప్రసంగిస్తూ గుంటూరు అమరావతి సాహితీ మిత్రుల సమక్షంలో తన పుస్తకం ఆవిష్కరణ ఆనందకరమని పేర్కొన్నారు. స్త్రీ లేని ప్రదేశం ఎడారితో సమానమని, స్త్రీల త్యాగాల గురించి చెప్పాలంటే ఎన్నో గ్రంథాలు రాయాలని పేర్కొంటూ స్త్రీ స్వేచ్ఛను హరించే దురదృష్టకరమైన పరిస్థితి నేడు నెలకొని ఉందని, దీని పట్ల ప్రజా చైతన్యం అవసరమని గ్రంథ రచయిత విద్యాధర్ తెలిపారు. ఇంకా ఈ కార్యక్రమంలో నిర్వహించిన కవితలు, కథలు, రీల్స్ పోటీలకు బండికల్లు జమదగ్ని న్యాయ నిర్ణేతగా వ్యవహరించారు. విజేతలుగా నిలిచిన మేడిశెట్టి సుభద్రా కృష్ణ, బండ్ల సుబ్రహ్మణ్యం, పరుచూరి కృష్ణ భార్గవి, జయ మాధురిలను శాలువాలతో ఘనంగా సత్కరించారు.ఈ సాహితీ సభలో పింగళి భాగ్యలక్ష్మి నిర్వహణలో సిహెచ్. వెంకటరత్నం, గడల శివప్రసాద్, పగడాల వెంకటరెడ్డి, తాటికోల పద్మావతి, తుమ్మల సాంబశివరావు, రాయసం గిరిజారాణి, రేపల్లె రాజ్ కృష్ణ, పాటిబండ్ల కవిత, పుట్టంరాజు నరసింహమూర్తి తదితర కవులు పాల్గొని తమ రచనలు వినిపించారు.