'ఖేత్ బచావో అభియాన్'

రామాయంపేట;రామాయంపేట రైతు వేదికలో వ్యవసాయ శాఖ ఆధ్వర్యంలో ‘ఖేత్ బచావో అభియాన్’ (కేబీఏ ) కార్యక్రమాన్ని ఏఓ ప్రవీణ్ కుమార్ ఆధ్వర్యంలో నిర్వహించారు.ఈ సందర్భంగా ఆయన మాట్లాడుతూ రైతులు ఈ యాసంగి సీజన్ లో వరి పంటకు బదులుగా పంట మార్పిడిని పాటిస్తూ ప్రత్యామ్నాయ పంటలను సాగు చేయాలని అధికారులు సూచించారు. నేల పరీక్షల ఆధారంగా ఎరువుల వినియోగం, సమతుల్య ఎరువుల యాజమాన్యం, ప్రకృతి వ్యవసాయం, పంట అవశేషాల నిర్వహణ, పంటల వైవిధ్యీకరణ, నీటి సంరక్షణ తదితర అంశాలపై రైతులకు అవగాహన కల్పించారు.నేల ఆరోగ్యాన్ని కాపాడుతూ, నీటి వనరులను పొదుపుగా వినియోగించుకోవాలని, స్థానిక పరిస్థితులకు అనుకూలమైన పప్పుధాన్యాలు, నూనెగింజల పంటలను సాగు చేయాలని అధికారులు సూచించారు. వ్యవసాయ పెట్టుబడి ఖర్చులను తగ్గించుకుని, మెరుగైన దిగుబడులు మరియు అధిక లాభాలు పొందేందుకు శాస్త్రీయ సాగు పద్ధతులను పాటించాలని రైతులకు వివరించారు.ఈ కార్యక్రమంలో వ్యవసాయ విస్తరణ అధికారి ప్రవీణ్, సందీప్, ఆత్మ (ఆత్మ ) సిబ్బంది ఏటీఎం కిరణ్ మరియు రైతులు పాల్గొన్నారు.