అమెరికాలో తెలంగాణ ప్రముఖుల కలయిక జీఎంఆర్‌కు ఆత్మీయ స్వాగతం
అమెరికాలోని న్యూయార్క్‌లో దసరా పండుగ సందర్భంగా జీఎంఆర్ ఫౌండేషన్ చైర్మన్, బీఆర్ఎస్ పార్టీ నాయకులు గుఱ్ఱపు మచ్చేందర్ తెలంగాణకు చెందిన ప్రముఖులను ఆత్మీయంగా కలుసుకొని పండుగ శుభాకాంక్షలు తెలియజేశారు.ఈ సందర్భంగా ప్రముఖ పారిశ్రామికవేత్త, బాక్టోలాక్ ఔషధ తయారీ సంస్థ వ్యవస్థాపకులు డాక్టర్ పైళ్ల మల్లారెడ్డి, వారి సతీమణిని మర్యాదపూర్వకంగా కలిశారు. తెలంగాణ గడ్డపై పుట్టి అమెరికాలో ఔషధ తయారీ రంగంలో అంతర్జాతీయ స్థాయిలో గుర్తింపు పొందిన డాక్టర్ మల్లారెడ్డి విజయ ప్రస్థానాన్ని అభినందించారు. 1995లో సంస్థను స్థాపించి మూడు దశాబ్దాలుగా తన కృషి, పట్టుదలతో ఉన్నత స్థాయికి తీసుకెళ్లడం ఎంతో అభినందనీయమని పేర్కొన్నారు. అదేవిధంగా అమెరికాలో వ్యాపార రంగంలో అంచెలంచెలుగా ఎదిగి ప్రత్యేక గుర్తింపు సంపాదించుకున్న లక్ష్మారెడ్డిని కూడా ఆత్మీయంగా కలుసుకొని దసరా శుభాకాంక్షలు తెలియజేశారు. అనంతరం తెలంగాణ ఉద్యమ సమయంలో తన పాటలు, గేయాల ద్వారా ప్రజల్లో ఉద్యమ స్ఫూర్తిని నింపిన ప్రముఖ గేయ రచయిత మిట్టపల్లి సురేందర్‌ను మర్యాదపూర్వకంగా కలుసుకున్నారు తెలంగాణ ఉద్యమంతో పాటు బీఆర్ఎస్ పార్టీ ప్రస్థానంలో ఆయన అందించిన సాహిత్య సేవలను కొనియాడారు. ఈ సందర్భంగా గుఱ్ఱపు మచ్చేందర్ మాట్లాడుతూ తెలంగాణ గడ్డపై పుట్టి ప్రపంచ స్థాయిలో తమ ప్రతిభను చాటుతున్న ప్రముఖులను కలుసుకోవడం ఎంతో ఆనందంగా, గర్వంగా ఉందన్నారు. పెద్దల అనుభవం, ఆత్మీయత, ఆశీస్సులు జీవితంలో ముందుకు సాగేందుకు ఎంతో స్ఫూర్తినిస్తాయని తెలిపారు. వారి ఆశీస్సులతో ప్రజాసేవలో మరింత అంకితభావంతో ముందుకు సాగుతానని పేర్కొన్నారు. అమెరికా గడ్డపై తెలంగాణ ఆత్మీయతను చాటుతూ ప్రముఖుల ఆశీస్సులు అందుకోవడం ఆనందంగా ఉందని, నారాయణఖేడ్ ప్రాంత అభివృద్ధి, ప్రజాసేవే లక్ష్యంగా నిరంతరం కృషి చేస్తానని మచ్చేందర్ తెలిపారు.
