అమెరికాలో అకస్మాత్తుగా పడిపోయిన నిర్మాణ రంగ ఖర్చులు

సూర్య బిజినెస్ డెస్క్: అమెరికాలో నిర్మాణ రంగ కార్యకలాపాలు ఊహించని విధంగా మందగించాయి. సెప్టెంబర్ నెలలో అమెరికా కన్స్ట్రక్షన్ స్పెండింగ్ (నిర్మాణ రంగ ఖర్చులు) ఏకంగా 1.9 శాతం మేర పడిపోయినట్లు అధికారిక గణాంకాలు వెల్లడించాయి. ఆగస్టు నెలలో నమోదైన 2 శాతం వృద్ధితో పోలిస్తే సెప్టెంబర్‌లో ఈ క్షీణత స్పష్టంగా కనిపించింది. ఏప్రిల్ 2020 తర్వాత ఒక నెలలో ఈ స్థాయిలో పడిపోవడం ఇదే మొదటిసారమని ఆర్థిక నిపుణులు పేర్కొంటున్నారు. మార్కెట్ అంచనాలకు భిన్నంగా నిర్మాణ వ్యయం భారీగా తగ్గడం అమెరికా ఆర్థిక రంగంలో చర్చనీయాంశమైంది.

ప్రైవేట్ రంగ నిర్మాణ కార్యకలాపాలు ఏకంగా 2.4 శాతం కుంచించుకుపోగా, ముఖ్యంగా రెసిడెన్షియల్ (నివాస గృహాల) రంగంలో 5.5 శాతం మేర భారీ తగ్గుదల నమోదైంది. గృహ నిర్మాణాలపై వడ్డీ రేట్లు పెరగడం మరియు నిర్మాణ సామగ్రి ఖర్చులు అధికంగా ఉండటం ఇందుకు ప్రధాన కారణాలుగా విశ్లేషకులు భావిస్తున్నారు. అయితే ప్రైవేట్ నాన్‌ రెసిడెన్షియల్ రంగంలో మాత్రం 1.1 శాతం వృద్ధి కనబడింది. మరోవైపు ప్రభుత్వ రంగ నిర్మాణ ఖర్చులు స్వల్పంగా 0.1 శాతం మేర తగ్గాయి. దేశీయ ఆర్థిక పరిస్థితులు, పెరిగిన వడ్డీ రేట్లు రియల్ ఎస్టేట్ మరియు నిర్మాణ రంగంపై తీవ్ర ప్రభావం చూపుతున్నాయని తాజా పరిణామాలు స్పష్టం చేస్తున్నాయి.