ఓటరు నమోదుతోనే పట్టభద్రుల ప్రాతినిధ్యం!*
*అర్హులైన ప్రతి పట్టభద్రుడు ఓటరుగా నమోదు చేసుకోవాలి.. బీవీఆర్‌ ఫౌండేషన్‌ చైర్మన్‌ బూరుగు భరత్‌రెడ్డి పిలుపు*
*చౌటుప్పల్‌, మేజర్ న్యూస్:* వరంగల్‌–ఖమ్మం–నల్గొండ పట్టభద్రుల ఎమ్మెల్సీ నియోజకవర్గ పరిధిలోని అర్హులైన పట్టభద్రులందరూ ఓటరుగా నమోదు చేసుకోవాలని బీవీఆర్‌ ఫౌండేషన్‌ చైర్మన్‌ బూరుగు భరత్‌రెడ్డి పిలుపునిచ్చారు. పట్టభద్రుల సమస్యలు, హక్కులు, ఆకాంక్షలకు చట్టసభల్లో తగిన ప్రాతినిధ్యం లభించాలంటే ప్రతి ఒక్కరూ ఓటు హక్కును పొందడం అవసరమని పేర్కొన్నారు.ఉన్నత విద్యను అభ్యసించిన పట్టభద్రులు ప్రజాస్వామ్య ప్రక్రియలో చురుకుగా భాగస్వాములు కావాలని సూచించారు. ఎమ్మెల్సీ ఎన్నికల్లో ఓటు హక్కు ద్వారా తమ అభిప్రాయాలను, సమస్యలను ప్రతిబింబించే నాయకత్వానికి ప్రాతినిధ్యం కల్పించే అవకాశం ఉంటుందన్నారు. అర్హత కలిగిన వారు ఓటరు నమోదును నిర్లక్ష్యం చేయకుండా అవసరమైన ధ్రువపత్రాలతో నిర్ణీత గడువులోగా దరఖాస్తు చేసుకోవాలని కోరారు.గ్రామీణ, పట్టణ ప్రాంతాల్లోని పట్టభద్రులకు ఓటరు నమోదుపై అవగాహన కల్పించాల్సిన బాధ్యత అందరిపైనా ఉందన్నారు. ముఖ్యంగా యువ పట్టభద్రులు ముందుకు వచ్చి తమ పేర్లను నమోదు చేసుకోవాలని, ఇతర అర్హులకు కూడా సమాచారం అందించాలని భరత్‌రెడ్డి విజ్ఞప్తి చేశారు.
