9న గుంటూరులో అమరవీరుల వర్ధంతి సభ

 గుంటూరు కలెక్టరేట్  న్యూస్ : భూమి, భుక్తి, విముక్తి పోరులో అమరులైన విప్లవ యోధుల వర్ధంతి సభను ఈనెల 9న గుంటూరులోని అరండల్ పేటలో గల కామ్రేడ్ మాదాల నారాయణ స్వామి భవనంలో నిర్వహిస్తున్నామని సిపిఐ (ఎంఎల్) న్యూడెమోక్రసీ జిల్లా కార్యదర్శివర్గ సభ్యులు యు.గనిరాజు తెలిపారు. సోమవారం స్థానిక ఎల్ఈఎం స్కూల్ ఎదురుగా ఉన్న మినీ గూడ్స్ ఆటో స్టాండ్ వద్ద అమరవీరుల వర్ధంతి సభల కరపత్రాన్ని ఆవిష్కరించారు.ఈ సందర్బంగా గనిరాజు మాట్లాడుతూ తెలంగాణ, నగ్జల్బరి, శ్రీకాకుళ, గోదావరిలోయ, దండకారణ్య పోరాటాల్లో వేలమంది విప్లవకారులు తమ విలువైన ప్రాణాలను తృణ ప్రాయంగా అర్పించారని అన్నారు. నవంబర్ నెలలోనే విప్లవ కమ్యూనిస్ట్ యోధులు కామ్రేడ్స్ చండ్ర పుల్లారెడ్డి, పోట్ల రామనరసయ్య, నీలం రామచంద్రయ్య, జేసీయస్ ప్రసాద్ వంటి అనేక మంది అమరులయ్యారని తెలిపారు. విప్లవోద్యమంలో కామ్రేడ్స్ చారు మజుందార్, దేవులపల్లి వెంకటేశ్వరరావు, సత్యనారాయణ సింగ్, తరిమెల నాగిరెడ్డి, కొల్లా వెంకయ్య, మాదాల నారాయణస్వామి, పైలా వాసుదేవరావు వంటి వారు అమరులయ్యారని తెలిపారు. నవంబర్ 1 నుండి 9 వరకూ అమరవీరుల వర్ధంతి సభలు జరపాలని న్యూడెమోక్రసీ కేంద్ర కమిటీ ఇచ్చిన పిలుపులో భాగంగా గుంటూరు, పల్నాడు, బాపట్ల ప్రాంతాలలో సభలు నిర్వహిస్తున్నామని తెలిపారు. గుంటూరులో నవంబర్ 9 న జరిగే అమరవీరుల వర్ధంతి సభను జయప్రదం చేయాలని పిలుపునిచ్చారు. ఈ కార్యక్రమంలో భారత కార్మిక సంఘాల సమాఖ్య రాష్ట్ర అధ్యక్షులు, నాయకులు ఎన్వికృష్ణ, నాగరాజు, సుబ్రహ్మణ్యం, శంకర్, పుల్లయ్య, ఆనంద్, బసవయ్య, జీవానంద్, రమేష్ తదితరులు పాల్గొన్నారు.