భారత్ రెన్యూవబుల్ ఎనర్జీ సమ్మిట్-2026 ప్రారంభం
సూర్య జాతీయ డెస్క్: గృహ వినియోగ అవసరాలను తీర్చేందుకు రౌండ్-ది-క్లాక్ ఆల్-వెదర్ సోలార్ మోడళ్లను, రూఫ్‌టాప్ సోలార్ కుకింగ్ మరియు ఎలక్ట్రిక్ వాహనాల ఛార్జింగ్ సదుపాయాలను అభివృద్ధి చేయాలని స్టార్టప్‌లు, ఐఐటీలు, ఆవిష్కర్తలకు ప్రధాన మంత్రి నరేంద్ర మోదీ పిలుపునిచ్చారు. న్యూఢిల్లీలోని భారత్ మంటపం వేదికగా 'భారత్ రెన్యూవబుల్ ఎనర్జీ సమ్మిట్ అండ్ ఎక్స్‌పో 2026'ను ప్రధాని మోదీ ఘనంగా ప్రారంభించారు. ఈ సందర్భంగా ఆయన మాట్లాడుతూ, సౌర విప్లవ కొత్త శకం కేవలం సాంకేతికతను స్వీకరించడంపైనే కాకుండా సరికొత్త ఆవిష్కరణలపై ఆధారపడి ఉంటుందని పేర్కొన్నారు. ఈ నూతన సాంకేతికతల ద్వారా మధ్యతరగతి కుటుంబాలు ప్రతిఏటా వేల రూపాయల విద్యుత్ బిల్లులను ఆదా చేసుకోవచ్చని స్పష్టం చేశారు.
ప్రపంచవ్యాప్తంగా వస్తున్న ఇంధన సంక్షోభాలు, కరోనా మహమ్మారి నుంచి పశ్చిమాసియా సంక్షోభాల వరకు ప్రతికూల పరిస్థితులను భారత్ సమర్థవంతంగా ఎదుర్కొంటూ అధిక ఆర్థిక వృద్ధిని సాధించిందని ప్రధాని అన్నారు. గడచిన దశాబ్ద కాలంగా క్లీన్ ఎనర్జీ రంగంలో చేసిన నిరంతర దేశీయ పెట్టుబడులు మరియు వ్యవస్థగత సంస్కరణల వల్ల భారత్ తీవ్రమైన బాహ్య షాకుల నుంచి రక్షించబడిందని చెప్పారు. దేశంలో నాన్-ఫాజిల్ ఇంధన సామర్థ్యాన్ని 2030 నాటికి 500 గిగావాట్లకు చేర్చాలనే లక్ష్యంతో ముందుకు వెళ్తున్నామని, ఇప్పటికే 300 గిగావాట్లకు పైగా సాధించామని తెలిపారు. వచ్చే దశాబ్ద కాలంలో మరో 500 గిగావాట్ల సరికొత్త నాన్-ఫాజిల్ సామర్థ్యాన్ని జోడించే దిశగా లక్ష్యాలను నిర్దేశించుకున్నట్లు వెల్లడించారు.
పీఎం సూర్యఘర్ ఉచిత విద్యుత్ పథకం ద్వారా కేవలం 24 నుంచి 25 నెలల్లోనే 65 లక్షలకు పైగా గృహాలు సోలార్ రూఫ్‌టాప్ సదుపాయాన్ని పొందాయని ప్రధాని తెలిపారు. ఈ పథకం ద్వారా వినియోగదారుల విద్యుత్ బిల్లులు సుమారు 76 శాతం వరకు తగ్గాయని, అనేక కుటుంబాలు అదనపు విద్యుత్‌ను గ్రిడ్‌కు విక్రయించి ఆదాయం పొందుతున్నాయని పేర్కొన్నారు. అలాగే వ్యవసాయ రంగంలో కుసుమ్ పథకం ద్వారా 30 లక్షలకు పైగా రైతులకు సోలార్ పంపులను అందించామని, తద్వారా అన్నదాతలకు ఏటా వేలాది రూపాయల ఆదా అవుతోందని వివరించారు.
దేశీయ తయారీ రంగానికి పెద్దపీట వేయడం వలనే భారత్ హరిత ఇంధన రంగంలో ఈ స్థాయి పురోగతి సాధించిందని మోదీ అన్నారు. దశాబ్ద కాలం కిందట కేవలం 2 గిగావాట్లుగా ఉన్న సోలార్ మాడ్యూల్ తయారీ సామర్థ్యం నేడు 200 గిగావాట్లకు పైగా పెరిగిందని తెలిపారు. ఆత్మనిర్భర్ భారత్ మరియు మేక్ ఇన్ ఇండియా నినాదాలు విజయవంతమవుతున్నాయని పేర్కొన్నారు. ఈ సదస్సులో ఇంటర్నేషనల్ సోలార్ అలయన్స్ తొమ్మిదవ అసెంబ్లీతో పాటు గ్రీన్ హైడ్రోజన్ నాల్గవ సదస్సు ప్రతినిధులు కూడా పాల్గొన్నారు. హరిత ఇంధన రంగంలో పెట్టుబడులను మరింత ఆకర్షిస్తూ, సుస్థిర భవిష్యత్తు కోసం ప్రపంచ దేశాలకు భారత్ తన సహకారాన్ని అందిస్తుందని ప్రధాని పునరుద్ఘాటించారు.
