మాగనూరులో అక్రమ ఇసుక రవాణా గుట్టురట్టు : రెండు టిప్పర్లు పట్టివేత

మాగనూర్ సూర్య న్యూస్ :
మాగనూర్ పోలీస్ స్టేషన్ పరిధిలో ఇసుక మాఫియాపై పోలీసులు ఉక్కుపాదం మోపారు. ప్రభుత్వ అనుమతులు లేకుండా, ఎలాంటి రవాణా పత్రాలు లేకుండా అక్రమంగా ఇసుకను తరలిస్తున్న రెండు వేర్వేరు టిప్పర్ వాహనాలను సోమవారం రాత్రి పోలీసులు పెట్టుకున్ని స్వాధీనం చేసుకున్నారు.
పోలీసులు తెలిపిన వివరాల ప్రకారం... మాగనూరు పోలీస్ సిబ్బంది తమ పరిధిలో రాత్రివేళ పెట్రోలింగ్ మరియు నిఘా విధుల్లో ఉన్న సమయంలో ఈ అక్రమ రవాణా గుట్టు రట్టయింది. మండలంలోని వడ్వాట్ గేటు సమీపంలో అనుమానాస్పదంగా వెళ్తున్న టిప్పర్‌ను ఆపి తనిఖీ చేయగా, ఎలాంటి పత్రాలు లేకుండా ఇసుకను అక్రమంగా తరలిస్తున్నట్లు తేలింది. మరొక ప్రాంతంలో నిర్వహించిన తనిఖీల్లోనూ సరైన అనుమతులు లేని మరో టిప్పర్‌ను పోలీసులు గుర్తించి అదుపులోకి తీసుకున్నారు. ఈ రెండు వేర్వేరు సంఘటనలకు సంబంధించి ఇసుక రవాణాకు పాల్పడుతున్న రెండు టిప్పర్లతో పాటు వాటి డ్రైవర్లను పోలీస్ స్టేషన్‌కు తరలించారు. అందిన ఫిర్యాదుల మేరకు మాగనూరు పోలీసులు విడివిడిగా కేసులు నమోదు చేసి దర్యాప్తు వేగవంతం చేసినట్లు ఎస్సై కె. మహేందర్ రెడ్డి వెల్లడించారు. ప్రభుత్వ నిబంధనలకు విరుద్ధంగా ఇసుకను తరలిస్తే ఎంతటి వారైనా ఉపేక్షించేది లేదని, చట్టపరమైన కఠిన చర్యలు ఉంటాయని ఈ సందర్భంగా ఎస్సై హెచ్చరించారు.

ఆంజనేయులు, సూర్య రిపోర్టర్ మాగనూర్ మండలం