కొల్లూరు జాబ్ మేళాకు అనూహ్య స్పందన

రామచంద్రపురం;నిరుద్యోగ యువతకు ఉద్యోగావకాశాలు కల్పించడమే లక్ష్యంగా ఎల్‌ఎన్‌ గ్రూప్‌ ఆధ్వర్యంలో కాంగ్రెస్‌ నాయకుడు రెడ్డి శ్రీనివాస్‌ రెడ్డి సహకారంతో సోమవారం కొల్లూరులో నిర్వహించిన మెగా జాబ్‌ మేళాకు అనూహ్య స్పందన లభించింది. ఈ మేళాలో అర్హత సాధించిన సుమారు 200 మంది నిరుద్యోగ యువతీ యువకులకు నియామక పత్రాలు అందజేశారు.ఈ సందర్భంగా రెడ్డి శ్రీనివాస్‌ రెడ్డి మాట్లాడుతూ.. జాబ్‌ మేళాలో మొత్తం 500 మందికి ఉద్యోగావకాశాలు కల్పించేందుకు అవకాశం ఉందని తెలిపారు. ఇప్పటికే 200 మందికి నియామక పత్రాలు అందజేయగా, మిగిలిన ఉద్యోగావకాశాలను కూడా నిరుద్యోగ యువత సద్వినియోగం చేసుకోవాలని పిలుపునిచ్చారు. ఎల్‌ఎన్‌ గ్రూప్‌ సంస్థ మరికొద్ది రోజులపాటు నియామక ప్రక్రియను కొనసాగించనున్నట్లు వెల్లడించారు.ముఖ్యంగా డబుల్‌ బెడ్‌రూమ్‌ ఇళ్లలో నివసిస్తున్న నిరుద్యోగ యువతీ యువకులు ఈ అవకాశాన్ని వినియోగించుకోవాలని సూచించారు.ఎల్‌ఎన్‌ గ్రూప్‌ అధినేత కౌశిక్‌ మాట్లాడుతూ.. ఆదిభట్లలోని ఇయర్‌ఫోన్‌ తయారీ కంపెనీలో అభ్యర్థులకు ఉద్యోగాలు కల్పిస్తున్నట్లు తెలిపారు. అర్హత కలిగిన నిరుద్యోగ యువత ఈ అవకాశాన్ని సద్వినియోగం చేసుకోవాలని కోరారు.ఈ కార్యక్రమంలో కాంగ్రెస్‌ నాయకులు వీరారెడ్డి,తూర్పు శ్రీనివాస్‌,రాంబాబు,బాబురావు తదితరులు పాల్గొన్నారు.