ప్రజావాణిలో పురుగు మందు డబ్బాతో రైతు ఆవేదన

మోత్కూర్, మేజర్ న్యూస్:
మోత్కూర్ మండల పరిషత్ కార్యాలయంలో నిర్వహిస్తున్న ప్రజావాణికి ఓ రైతు పురుగుమందు డబ్బాతో రావడం కలకలం రేపింది. మోత్కూర్ మున్సిపల్ పరిధిలోని బుజిలాపురం గ్రామానికి చెందిన రైతు మడూరి నారాయణరెడ్డి ఆయన భార్య నీలమ్మ సోమవారం ఎంపీడీవో కార్యాలయం నిర్వహించిన ప్రజావాణిలో తన భూ సమస్యను పరిష్కరించాలని కోరుతూ వినపత్రం సమర్పించారు.అనంతరం సంచిలో తెచ్చుకున్న పురుగుల మందు డబ్బా తీసి తనకు న్యాయం చేయకపోయినట్లయితే పురుగుల మందు తాగి ఆత్మహత్య చేసుకుంటానని హెచ్చరించడంతో అధికారుల అప్రమత్తమై ఆ పురుగుల మందు డబ్బాను రైతు నుండి లాక్కొని కార్యాలయం ఆవరణలో నిర్వీర్యం చేశారు. తన భూ సమస్య పరిష్కారం కోసం 8 ఏళ్లుగా అధికారుల చుట్టూ తిరుగుతున్న న్యాయం జరగడం లేదని రైతు ఆవేదన వ్యక్తం చేశారు. తమ తండ్రి నుంచి వారసత్వంగా వచ్చిన మూడున్నర ఎకరాల భూమిని గ్రామానికి చెందిన కొందరు వ్యక్తులు ఆక్రమించుకున్నారని విచారణ జరిపి తమకు న్యాయం చేయాలని కోరారు. రెవెన్యూ, కలెక్టర్ కార్యాలయం చుట్టూ తిరుగుతూ పలుమార్లు వినతి పత్రాలు ఇచ్చిన పరిష్కారం లభించలేదని వాపోయారు. బ్రతుకుతెరువు కోసం హైదరాబాద్ పోయి వచ్చేసరికి తన భూమిని ఆక్రమించుకొని ఇబ్బందులకు గురి చేస్తున్నారన్నారని ఆరోపించారు. తనకు తగిన న్యాయం చేయాలని కోరారు.