ఏకగ్రీవాలపై జగన్ నీతులా..

గుంటూరు కలెక్టరేట్  న్యూస్: స్థానిక సంస్థల ఎన్నికల వేళ పులివెందులతో ప్రజలు స్వేచ్ఛగా ఓటు హక్కు వినియోగించుకోవడం జగన్ కు మింగుడు పడటం లేదని గుంటూరు తూర్పు ఎమ్మెల్యే, అసెంబ్లీ మైనారిటీస్ కమిటీ చైర్మన్ నసీర్ అన్నారు. సోమవారం మంగళగిరిలోని తెలుగుదేశం పార్టీ రాష్ట్ర కార్యాలయంలో మీడియా సమావేశం నిర్వహించారు. ఈ సందర్భంగా ఎమ్మెల్యే నసీర్ మాట్లాడుతూ రాష్ట్రంలో స్థానిక సంస్థల ఎన్నికలు ప్రశాంత వాతావరణంలో నిర్వహించడం జగన్ కు ఇష్టం లేదన్నారు. గత వైసీపీ ప్రభుత్వంలో ప్రజల ఆమోదంతోనే ఏకగ్రీవాలు జరుగుతాయని చెప్పిన జగన్.. ఇప్పుడు ఏకగ్రీవాలపై గగ్గోలు పెడుతుంటే జనం నవ్వుతున్నారని చెప్పారు. స్థానిక సంస్థల్లో ప్రజలకు అక్కడ పరిస్థితులకు అనుగుణంగా నాయకులను ఎన్నుకుంటారని, కానీ జగన్ ఏకగ్రీవాలపై ఇష్టం వచ్చినట్లు మాట్లాడుతున్నారని మండిపడ్డారు. స్థానిక సంస్థల ఎన్నికల్లో వైసీపీ తరఫున అభ్యర్థులను ఎంపిక చేయక ముందే ఏకగ్రీవాలపై రెచ్చగొట్టేలా జగన్ వ్యవహరించారని చెప్పారు. పుంగనూరు, రాయచోటి, పులివెందుల వంటి ప్రాంతాల్లో ముస్లిం మైనారిటీలు బలంగా ఉన్నారని, ఆయా ప్రాంతాల్లో జగన్ ఎన్నికలు అడ్డుకుకోవాలని చూశారన్నారు. పుంగనూరు, రాయచోటి, నంద్యాల, పిడుగురాళ్ల వంటి ప్రాంతాల్లో మైనారిటీలు ఏకగ్రీవమయ్యారని, మైనారిటీల వ్యతిరేకి జగన్ అని అన్నారు. రాష్ట్రానికి జగన్ రాబందులా తయారయ్యారని విమర్శించారు. రానున్న ప్రతి ఎన్నికల్లోనూ ప్రజలు స్వచ్ఛందంగా ఓట్లు వేసి జగన్ కు బుద్ది చెబుతారని చెప్పారు.