కాంగ్రెస్ వైఫల్యాలపై గ్రామగ్రామాన పాదయాత్ర చేపడతాం

సదాశివపేట;కాంగ్రెస్ ప్రభుత్వ వైఫల్యాలు, ప్రజలు ఎదుర్కొంటున్న సమస్యలను ప్రజల్లోకి తీసుకెళ్లేందుకు త్వరలోనే గ్రామగ్రామాన పాదయాత్ర చేపడతామని సంగారెడ్డి ఎమ్మెల్యే చింతా ప్రభాకర్ ప్రకటించారు. సదాశివపేట మండలంలో బీఆర్ఎస్ పార్టీ ఆధ్వర్యంలో నిర్వహించిన ఆత్మీయ సమ్మేళనానికి ఆయన ముఖ్య అతిథిగా హాజరై నాయకులు, కార్యకర్తలను ఉద్దేశించి ప్రసంగించారు.ఈ సందర్భంగా పలువురు బీఆర్ఎస్ కార్యకర్తలు కాంగ్రెస్ ప్రభుత్వ పాలనలో ఎదుర్కొంటున్న సమస్యలు, అక్రమ అరెస్టులు, వేధింపులు, అవమానాలను ఎమ్మెల్యే దృష్టికి తీసుకువచ్చారు. వారి సమస్యలను సావధానంగా విన్న చింతా ప్రభాకర్ ప్రతి కార్యకర్తకు అండగా ఉంటానని భరోసా ఇచ్చారు.అనంతరం ఆయన మాట్లాడుతూ కాంగ్రెస్ ప్రభుత్వం ఎన్నికల సమయంలో ఇచ్చిన హామీలను అమలు చేయడంలో విఫలమైందని, ప్రజా సమస్యలను పట్టించుకోవడం లేదని విమర్శించారు. కాంగ్రెస్ నాయకులు అంతర్గత విభేదాలతో ఒకరిపై ఒకరు విమర్శలు చేసుకుంటూ కాలం గడుపుతున్నారని, రైతులకు సాగునీరు అందించలేని పరిస్థితి నెలకొందని మండిపడ్డారు.గత బీఆర్ఎస్ ప్రభుత్వ హయాంలో కేసీఆర్ రైతులకు 24 గంటల నాణ్యమైన ఉచిత విద్యుత్ అందించారని గుర్తుచేశారు. కాంగ్రెస్ నాయకులు అధికారంలోకి వస్తే 48 గంటల కరెంట్ ఇస్తామని చెప్పి, ప్రస్తుతం రైతులకు అవసరమైన విద్యుత్, సాగునీరు అందించలేకపోతున్నారని విమర్శించారు.

బీఆర్ఎస్ కార్యకర్తలకు భరోసా ఇస్తూ.. పార్టీ కార్యకర్తకు ఏ చిన్న ఆపద వచ్చినా, సమస్య ఎదురైనా ఒక్క మిస్ కాల్ చేయాలని, వెంటనే వారి ముందుకు వచ్చి అండగా నిలబడతానని స్పష్టం చేశారు. గత బీఆర్ఎస్ పాలనలో రాజకీయ కక్షలకు తావివ్వకుండా ప్రతిపక్ష నాయకులు, కార్యకర్తలను ఇబ్బందులకు గురిచేయలేదని పేర్కొన్నారు. ప్రస్తుత కాంగ్రెస్ పాలనలో బీఆర్ఎస్ కార్యకర్తలు వేధింపులకు గురవుతున్నారని ఆవేదన వ్యక్తం చేశారు.కార్యకర్తలు ఎవరూ అధైర్యపడవద్దని, ప్రతి ఒక్కరికీ అండగా ఉంటానని తెలిపారు. అయితే పార్టీకి నష్టం కలిగించేలా వ్యవహరించే వారిని ఉపేక్షించేది లేదని, నాయకులు, కార్యకర్తలు పార్టీ క్రమశిక్షణకు కట్టుబడి సమన్వయంతో పనిచేయాలని సూచించారు. బీఆర్ఎస్ పార్టీ బలోపేతానికి ప్రతి ఒక్కరూ కృషి చేయాలని, ప్రజా సమస్యలపై నిరంతరం పోరాటం కొనసాగించాలని పిలుపునిచ్చారు.ఈ కార్యక్రమానికి మండల పార్టీ అధ్యక్షుడు పెద్దగొల్ల ఆంజనేయులు అధ్యక్షత వహించగా, సీడీసీ మాజీ చైర్మన్ కాసాల బుచ్చిరెడ్డి, మాజీ మార్కెట్ కమిటీ చైర్మన్లు గడిల సుధీర్ రెడ్డి, కోడూరి రమేష్, కుందనరాజు, పట్టణ పార్టీ అధ్యక్షుడు చిలమల్లన్న, సీనియర్ నాయకులు చింత సాయినాథ్, ఆత్మకూరు నగేష్, స్థానిక సర్పంచ్ తొంట కిష్టయ్య, మాజీ సర్పంచులు లక్ష్మారెడ్డి, గడ్డమీద సత్యనారాయణ, మాజీ ఎంపీటీసీలు సత్యనారాయణ యాదవ్, అమరేందర్ రెడ్డి, సుధాకర్, మాధవరెడ్డి, శివకుమార్, అల్లం లలిత, అహ్మద్, అశోక్, పండరి, సర్పంచులు రవికుమార్, కృష్ణారెడ్డి, సంతోష్ గౌడ్, ప్రమోద్, నవీన్ కుమార్, నాగరాజు, గుడ్ల లక్ష్మణ్, యువజన విభాగం అధ్యక్షులు నరేష్ గౌడ్, నగేష్ యాదవ్, బీఆర్ఎస్వీ ఇన్‌చార్జి శ్రీహరి, నిజాముద్దీన్, సలావుద్దీన్, పాండు నాయక్, మాజీ మార్కెట్ కమిటీ వైస్ చైర్మన్ శ్రీధర్ రెడ్డి, మాజీ సర్పంచులు మాణిక్, రాములు, దశరథ్, నగేష్, సిద్ధన్న, సంగమేష్, కరుణాకర్, సంఘన్న, శేఖర్, రాములు తదితర నాయకులు పాల్గొన్నారు.