గ్యాస్ సిలిండర్ పేలుడుతో ఇంట్లో భారీ బీభత్సం.. గోడలు కూలి మహిళకు తీవ్ర గాయాలు

మేడ్చల్, మేజర్ న్యూస్: ఎల్లంపేట మున్సిపాలిటీ పరిధిలోని నూతనకల్ వార్డులో గ్యాస్ సిలిండర్ పేలుడు తీవ్ర కలకలం రేపింది. గ్యాస్ లీకేజీ కారణంగా ఇంట్లో ఒక్కసారిగా మంటలు చెలరేగి భారీ పేలుడు సంభవించడంతో ఇంటి గోడలు కూలిపోయాయి. ఈ ప్రమాదంలో ఇంట్లో ఉన్న అంజని (24) అనే మహిళ తీవ్రంగా గాయపడింది.వివరాల్లోకి వెళ్తే.. నూతనకల్ వార్డులో బండమీది సూర్యారావుకు చెందిన ఇంట్లో అంజని అద్దెకు నివాసం ఉంటోంది. సోమవారం ఇంట్లో గ్యాస్ లీకేజీ కారణంగా ప్రమాదవశాత్తు మంటలు చెలరేగి ఒక్కసారిగా సిలిండర్ పేలినట్లు సమాచారం. పేలుడు ధాటికి ఇంటి గోడలు కూలిపోయి భారీగా ఆస్తి నష్టం వాటిల్లింది. ఇంట్లో ఉన్న అంజనికి మంటలు అంటుకోవడంతో తీవ్ర గాయాలయ్యాయి.పేలుడు శబ్దానికి చుట్టుపక్కల నివాసితులు ఒక్కసారిగా ఉలిక్కిపడ్డారు. వెంటనే ఘటనాస్థలికి చేరుకున్న స్థానికులు మంటలను అదుపు చేసి, తీవ్రంగా గాయపడిన అంజనిని చికిత్స నిమిత్తం సీఎంఆర్ ఆసుపత్రికి తరలించారు. క్షణాల్లో జరిగిన ఈ ప్రమాదంతో నూతనకల్ వార్డులో భయాందోళన వాతావరణం నెలకొంది.గ్యాస్ లీకేజీ కారణంగా జరిగిన ఈ ప్రమాదంలో ఇంటికి భారీ నష్టం వాటిల్లింది. ప్రమాదానికి గల పూర్తి కారణాలు తెలియాల్సి ఉండగా, బాధితురాలి ఆరోగ్య పరిస్థితిపై స్థానికులు ఆందోళన వ్యక్తం చేస్తున్నారు.