డ్రగ్స్ రహిత సమాజ నిర్మాణానికి హెల్తీ రన్ పోస్టర్ ఆవిష్కరించిన కలెక్టర్ కోయ శ్రీహర్ష
సూర్య - పెద్దపల్లి : డ్రగ్స్ రహిత సమాజ నిర్మాణమే లక్ష్యంగా ఈ నెల 29న నిర్వహించనున్న పెద్దపల్లి హెల్తీ రన్–5Kలో యువత, విద్యార్థులు, ప్రజలు పెద్ద సంఖ్యలో పాల్గొని విజయవంతం చేయాలని జిల్లా కలెక్టర్ కోయ శ్రీహర్ష కోరారు. సోమవారం తన ఛాంబర్లో హెల్తీ రన్కు సంబంధించిన పోస్టర్ను ఆవిష్కరించారు.ఈ సందర్భంగా కలెక్టర్ మాట్లాడుతూ 'యెస్ ఫర్ లైఫ్ – సే నో టు డ్రగ్స్' నినాదంతో మాదకద్రవ్యాల దుష్పరిణామాలపై ప్రజల్లో అవగాహన కల్పించేందుకు ఈ కార్యక్రమం నిర్వహిస్తున్నట్లు తెలిపారు. యువత మత్తు పదార్థాలకు దూరంగా ఉంటూ ఆరోగ్యకరమైన జీవనశైలిని అలవర్చుకోవాలని సూచించారు. పెద్దపల్లి జిల్లాను డ్రగ్స్ రహితంగా మార్చేందుకు ప్రతి ఒక్కరూ సామాజిక బాధ్యతతో ముందుకు రావాలని పిలుపునిచ్చారు. ఈ రన్లో పాల్గొనేందుకు రిజిస్ట్రేషన్ ఉచితమని తెలిపారు. కార్యక్రమంలో జిల్లా మార్కెటింగ్ అధికారి ప్రవీణ్రెడ్డి, ఇతర అధికారులు పాల్గొన్నారు.