ముందస్తు ఏర్పాట్లు చేసుకోవాలి.. అధికారులకు ఏపీసీపీడీసీఎల్ సీఎండీ పి. పుల్లారెడ్డి ఆదేశం
అమరావతి, మేజర్న్యూస్ :
ఆక్వాన్ తుపాను నేపథ్యంలో విద్యుత్ సరఫరాకు అంతరాయం కలగకుండా, విద్యుత్ వ్యవస్థకు నష్టం వాటిల్లకుండా అన్ని ముందస్తు జాగ్రత్త చర్యలు చేపట్టాలని ఏపీసీపీడీసీఎల్ సీఎండీ శ్రీ పి. పుల్లారెడ్డి గారు క్షేత్రస్థాయి అధికారులను ఆదేశించారు. ఏపీసీపీడీసీఎల్ పరిధిలోని విద్యుత్ అధికారులతో నిర్వహించిన టెలికాన్ఫరెన్స్లో తుఫాన్ సన్నద్ధత చర్యలపై సమీక్షిస్తూ, ఈ నెల 17, 18 తేదీల్లో విద్యుత్ లైన్లకు అడ్డుగా ఉన్న చెట్ల కొమ్మల తొలగింపు, వాలిన విద్యుత్ స్తంభాల సరిచేత, వదులుగా ఉన్న విద్యుత్ వైర్లను బిగించే పనులను తప్పనిసరిగా పూర్తి చేయాలని సూచించారు.
ప్రతి సబ్ డివిజన్ పరిధిలో కనీసం రెండు లోడ్ల 9.1 మీటర్ల విద్యుత్ స్తంభాలు, ఒక లోడ్ 8 మీటర్ల విద్యుత్ స్తంభాలను సిద్ధంగా ఉంచుకోవాలని ఆదేశించారు. స్థానిక సెక్షన్ కాంట్రాక్టర్లు, RDSS కాంట్రాక్టర్ల ద్వారా అవసరమైన సిబ్బందిని సమీకరించి, వారి సంప్రదింపు వివరాలను అందుబాటులో ఉంచుకోవాలన్నారు.
అదేవిధంగా విద్యుత్ స్తంభాల ఏర్పాటు, మరమ్మతు పనుల కోసం పోల్ డిగ్గర్లు, JCBలు తదితర యంత్రాలను సిద్ధంగా ఉంచుకోవాలని తెలిపారు. తుఫాన్ ప్రభావం పూర్తిగా తగ్గే వరకు విద్యుత్ శాఖ సిబ్బందికి సెలవులు మంజూరు చేయరాదని స్పష్టం చేశారు.
తుఫాన్ సమయంలో విద్యుత్ అంతరాయాలు ఏర్పడితే తక్షణమే స్పందించి, సాధ్యమైనంత త్వరగా విద్యుత్ సరఫరాను పునరుద్ధరించేలా అన్ని అధికారులు, సిబ్బంది పూర్తి అప్రమత్తతతో పనిచేయాలని సీఎండీ పి. పుల్లారెడ్డి గారు ఆదేశించారు.