మార్కాపురం జిల్లాలో కరవు నివారణ మరియు సమగ్ర ఉపశమన చర్యలకు పెద్దపీట: జిల్లా కలెక్టర్ ఎం. విజయ సునీత
మార్కాపురం, మేజర్న్యూస్ :
ఖరీఫ్ 2026 సీజన్లో ఏర్పడిన తీవ్ర వర్షాభావ పరిస్థితులు మరియు కరవు ప్రభావం నుండి మార్కాపురం జిల్లాను ఆదుకునేందుకు, గ్రామీణ జీవనోపాధులను రక్షించేందుకు జిల్లా యంత్రాంగం ముమ్మర చర్యలు చేపట్టింది. కలెక్టరేట్లో సోమవారం జరిగిన జిల్లా స్థాయి భాగస్వాముల సమావేశంలో జిల్లా కలెక్టర్ ఎం. విజయ సునీత కరవు నివారణ మరియు సహాయక చర్యల ప్రణాళికపై సమీక్ష నిర్వహించారు.
ఈ సందర్భంగా కలెక్టర్ మాట్లాడుతూ, మార్కాపురం జిల్లాలో మొత్తం 21 మండలాలు ఉండగా, జూన్ 1 నుండి ఆగస్టు 31, 2026 మధ్య కాలంలో సాధారణ వర్షపాతం 424.3 మి.మీ. కాగా కేవలం 197.6 మి.మీ. మాత్రమే వర్షపాతం నమోదైందని (సుమారు 53.4% లోటు) తెలిపారు. దీనివల్ల జిల్లాలోని 19 మండలాలు తీవ్ర కరవు ప్రాంతాలుగా ప్రభావితమయ్యాయని పేర్కొన్నారు. ఈ క్లిష్ట పరిస్థితుల్లో తాగునీటి సరఫరాకు ఎలాంటి అంతరాయం కలగకుండా చూడటంతో పాటు, వ్యవసాయం, పశుసంపద మరియు గ్రామీణ కుటుంబాల జీవనోపాధిని పరిరక్షించేందుకు ప్రభుత్వం అన్ని చర్యలు తీసుకుంటోందని స్పష్టం చేశారు.