చార్మినార్ భాగ్యలక్ష్మి అమ్మవారిని దర్శించుకోనున్న గవర్నర్
లోక్‌భవన్‌లో ఘనంగా ముందస్తు దీపావళి వేడుకలు
హైదరాబాద్‌, మేజర్ న్యూస్ ప్రతినిధి : తెలంగాణ గవర్నర్ శివ ప్రతాప్‌ శుక్లా ఆదివారం చార్మినార్ వద్దనున్న భాగ్యలక్ష్మి అమ్మవారి ఆలయాన్ని సందర్శించనున్నారు. ఉదయం 9.30 గంటలకు ప్రత్యేక పూజలు నిర్వహించనున్నారు. మరోవైపు, శనివారం సాయంత్రం లోక్‌భవన్‌లో ముందస్తు దీపావళి వేడుకలు ఘనంగా నిర్వహించారు. ఈ సందర్భంగా గవర్నర్ మాట్లాడుతూ.. దీపావళి స్ఫూర్తి కేవలం మన ఇళ్లలోనే కాకుండా పేదల జీవితాల్లోనూ వెలుగులు నింపడమని పేర్కొన్నారు. అయోధ్య దీపోత్సవం స్ఫూర్తితో కొవ్వొత్తులకు బదులుగా స్థానిక మట్టి ప్రమిదలను వినియోగించి స్వదేశీ కళాకారులను ప్రోత్సహించాలని సూచించారు. పిల్లలు బాణసంచా కాల్చేటప్పుడు తగిన జాగ్రత్తలు పాటించాలని పిలుపునిచ్చారు.ఈ కార్యక్రమంలో ప్రత్యేక ప్రధాన కార్యదర్శి ఎం. దాన కిషోర్‌తో పాటు లోక్‌భవన్ అధికారులు పాల్గొన్నారు.
