భూ రీసర్వే పారదర్శకంగా నిర్వహించాలి : కలెక్టర్ సి. నారాయణ రెడ్డి

రంగారెడ్డి : భూ రీసర్వే ప్రక్రియను పూర్తి పారదర్శకంగా, పకడ్బందీగా నిర్వహించాలని జిల్లా కలెక్టర్ సి. నారాయణ రెడ్డి అధికారులను ఆదేశించారు. ప్రతి రైతుకు సంబంధించిన భూములను క్షేత్రస్థాయిలో కచ్చితంగా గుర్తించి, సరిహద్దుల నిర్ధారణలో ఎలాంటి పొరపాట్లకు తావులేకుండా చర్యలు తీసుకోవాలని స్పష్టం చేశారు.

బుధవారం ఇబ్రహీంపట్నం మండలం రాందాస్‌పల్లి గ్రామంలో కొనసాగుతున్న భూ రీసర్వే ప్రక్రియను కలెక్టర్ క్షేత్రస్థాయిలో పరిశీలించారు. సర్వే నిర్వహణ తీరును, రైతుల భూముల హద్దుల గుర్తింపు ప్రక్రియను తనిఖీ చేసి అధికారులకు పలు సూచనలు చేశారు. భవిష్యత్తులో భూ వివాదాలు తలెత్తకుండా ప్రతి రైతు భూమి సరిహద్దులను స్పష్టంగా నిర్ధారించాలని సూచించారు.

సర్వే నిర్వహణకు కనీసం 24 గంటల ముందుగానే సంబంధిత పట్టాదారులకు నోటీసులు అందించాలని ఆదేశించారు. ఏ రోజు, ఏ సమయంలో, ఏ ప్రాంతంలో సర్వే నిర్వహించనున్నారో ముందస్తుగా రైతులకు తెలియజేయడంతో పాటు నోటీసులు అందించిన వివరాలను రికార్డుల్లో నమోదు చేయాలన్నారు. సర్వేకు హాజరైన రైతులు, నోటీసులు అందుకున్నప్పటికీ హాజరుకాని పట్టాదారుల వివరాలను సైతం నమోదు చేయాలని సూచించారు.

సర్వే నంబర్ల ఆధారంగానే కాకుండా రైతుల వారీగా భూములను గుర్తించి హద్దులు నిర్ధారించాలని కలెక్టర్ పేర్కొన్నారు. అవసరమైన చోట ఫ్లాగ్‌లు ఏర్పాటు చేసి, రైతులకు వారి భూముల సరిహద్దులను ప్రత్యక్షంగా చూపిస్తూ వారి సమక్షంలోనే సర్వే నిర్వహించాలన్నారు. సర్వే అనంతరం భూమి విస్తీర్ణం, సరిహద్దులు, ఇతర వివరాలను కచ్చితంగా నమోదు చేసి నివేదికలు సిద్ధం చేయాలని ఆదేశించారు.

క్షేత్రస్థాయి సర్వే వివరాలకు, రెవెన్యూ రికార్డుల్లోని వివరాలకు మధ్య వ్యత్యాసాలు ఉంటే క్షుణ్ణంగా పరిశీలించి నిబంధనల ప్రకారం పరిష్కరించాలని తెలిపారు. భూ రీసర్వేపై రైతులకు పూర్తి అవగాహన కల్పిస్తూ వారి సందేహాలను ఎప్పటికప్పుడు నివృత్తి చేయాలన్నారు. సర్వేలో నిర్లక్ష్యం, తొందరపాటు నిర్ణయాలకు తావులేకుండా అధికారులు బాధ్యతాయుతంగా విధులు నిర్వహించాలని స్పష్టం చేశారు.

భూ రీసర్వే విజయవంతంగా పూర్తయ్యేందుకు రైతులు, గ్రామస్థులు సర్వే బృందాలకు సహకరించాలని కలెక్టర్ కోరారు.

ఈ కార్యక్రమంలో ఇబ్రహీంపట్నం ఆర్డీఓ శ్రీనివాస్ రెడ్డి, ఏడీ సర్వే అండ్ ల్యాండ్ రికార్డ్స్ రాంరెడ్డి, తహశీల్దార్ సునీత, సర్వేయర్లు, సంబంధిత అధికారులు, రైతులు పాల్గొన్నారు.

వడ్ల శ్రీనివాస చారి, రంగారెడ్డి - మేజర్ న్యూస్