సూర్య ఆసిఫాబాద్ జిల్లా ప్రతినిధి : దేశంలో విద్యా రంగ అభివృద్ధికి మౌలానా అబుల్ కలాం ఆజాద్ చేసిన కృషి చిరస్మరణీయమని జిల్లా కలెక్టర్ కె.హరిత అన్నారు. బుధవారం స్వాతంత్ర సమరయోధుడు, విద్యావేత్త, భారతదేశ తొలి విద్యాశాఖ మంత్రి, భారతరత్న మౌలానా ఆజాద్ జయంతిని పురస్కరించుకుని జిల్లా కేంద్రంలోని సమీకృత జిల్లా కలెక్టరేట్ భవన సమావేశం మందిరంలో జిల్లా మైనారిటీ సంక్షేమ శాఖ ఆధ్వర్యంలో ఏర్పాటుచేసిన కార్యక్రమానికి జిల్లా రెవెన్యూ అధికారి దాసరి వేణు, ఆసిఫాబాద్ మున్సిపల్ చైర్మన్ మెంగ్రే ఆకాష్, వైస్ చైర్మన్ ఎం.డి. అహ్మద్, ప్రాథమిక వ్యవసాయ సహకార సంఘం చైర్మన్ అలీబిన్ అహ్మద్, మున్సిపల్ కమిషనర్లతో కలిసి హాజరై ఆజాద్ చిత్రపటానికి పూలమాలలు వేసి ఘనంగా నివాళులు అర్పించారు. జిల్లా కలెక్టర్ మాట్లాడుతూ భారతరత్న మౌలానా అబుల్ కలాం ఆజాద్ దేశంలో విద్యారంగ అభివృద్ధికి చేసిన కృషి నేటి తరం స్పూర్తిగా తీసుకోవాలని తెలిపారు. స్వాతంత్ర ఉద్యమంలో గాంధీతో కలిసి పాల్గొని స్వాతంత్రం సాధించడంలో ప్రముఖ పాత్ర పోషించారని, మహనీయుల ఆశయాలను నేటితరం యువత కొనసాగించాలని తెలిపారు. మైనారిటీల సంక్షేమం కోసం ప్రభుత్వం చేపడుతున్న కార్యక్రమాలను సద్వినియోగం చేసుకోవాలని, దేశ అభివృద్ధిలో భాగస్వామ్యులు కావాలని తెలిపారు. ఈ కార్యక్రమంలో ఇన్చార్జి జిల్లా మైనారిటీ సంక్షేమ అధికారి తిరుపతి, కౌన్సిలర్లు సాలాంబిన్ అహ్మద్, బాలకృష్ణ, మైనారిటీ సంక్షేమ సంఘాల ప్రతినిధులు, సంబంధిత అధికారులు తదితరులు పాల్గొన్నారు.
