అధిక సాంద్రత పద్ధతితో పత్తిలో అధిక దిగుబడి

• కపాస్ క్రాంతి పథకంతో రైతులకు ప్రోత్సాహం

• అధిక సాంద్రత సాగుతో మెరుగైన ఫలితాలు సాధ్యం ఏఈఓ సాగర్

సూర్య, మంచిర్యాల జిల్లా ప్రతినిధి :

పత్తి సాగులో అధిక సాంద్రత పద్ధతిని అనుసరించడం ద్వారా అధిక దిగుబడులు సాధించవచ్చని కాశిపేట మండల వ్యవసాయ విస్తరణ అధికారి (ఏఈఓ) సాగర్ అన్నారు. బుధవారం నూజివీడు సీడ్స్ ఆధ్వర్యంలో నిర్వహించిన అధిక సాంద్రత పత్తి పంట క్షేత్ర ప్రదర్శన కార్యక్రమంలో పాల్గొని రైతులకు సాగు విధానంపై అవగాహన కల్పించారు.

ఈ సందర్భంగా ఏఈఓ సాగర్ మాట్లాడుతూ.. ప్రభుత్వం ఈ ఏడాది కపాస్ క్రాంతి పథకం కింద రైతులకు ఉచితంగా పత్తి విత్తనాలు అందించి అధిక సాంద్రత సాగు విధానాన్ని ప్రోత్సహిస్తోందని తెలిపారు. ఈ పద్ధతిలో ఎకరాకు మొక్కల సంఖ్యను పెంచడంతో పాటు, పంట ఎదుగుదలను నియంత్రించేందుకు మెపిక్వాట్ క్లోరైడ్ మందును సూచించిన విధంగా పిచికారీ చేయడం ద్వారా మెరుగైన దిగుబడులు సాధించే అవకాశం ఉంటుందని వివరించారు.

నూజివీడు సీడ్స్‌కు చెందిన అర్మిత ఎన్‌సీఎస్ 2778 రకం అధిక సాంద్రత పద్ధతిలో సాగుకు అనువైనదని, రైతులు ఈ రకంపై అవగాహన పెంచుకొని సాగు విధానాలను పాటించాలని సూచించారు. ఆధునిక వ్యవసాయ పద్ధతులను అనుసరిస్తూ తక్కువ ఖర్చుతో మెరుగైన దిగుబడులు సాధించే దిశగా రైతులు ముందుకు సాగాలని అన్నారు.

ఈ కార్యక్రమంలో నూజివీడు సీడ్స్ టెరిటరీ మేనేజర్ రాజబాబు, మార్కెట్ డెవలప్‌మెంట్ ఆఫీసర్ వెంకటేష్, పలువురు రైతులు పాల్గొన్నారు.