భవిష్యత్తు రవాణా ఎలక్ట్రిక్ వాహనాలదే! నేషనల్ హైవే పక్కన ఈవీ ఛార్జింగ్ స్టేషన్ ప్రారంభించిన ఎమ్మెల్యే చింత ప్రభాకర్
కొండాపూర్ ; భవిష్యత్తులో ఎలక్ట్రిక్ వాహనాల వినియోగానికి మరింత ప్రాధాన్యత పెరుగుతుందని సంగారెడ్డి ఎమ్మెల్యే చింత ప్రభాకర్ అన్నారు. మండల పరిధిలోని గిర్మాపూర్ గ్రామానికి చెందిన మాజీ సర్పంచ్ లు పట్లోళ్ల నిర్మల మల్లేశం నేషనల్ హైవే పక్కన నూతనంగా ఏర్పాటు చేసిన ఈవీ ఛార్జింగ్ స్టేషన్ను ఎమ్మెల్యే ముఖ్య అతిథిగా హాజరై ప్రారంభించారు.ఈ సందర్భంగా ఎమ్మెల్యే మాట్లాడుతూ పెరుగుతున్న ఎలక్ట్రిక్ వాహనాల వినియోగానికి అనుగుణంగా ఛార్జింగ్ స్టేషన్ల ఏర్పాటు అవసరమని, ఈ దిశగా మల్లేశం ముందడుగు వేయడం అభినందనీయమన్నారు. యువత చదువుతో ఉన్నత స్థానాలకు ఎదగడంతో పాటు ప్రభుత్వ ఉద్యోగాలపైనే ఆధారపడకుండా స్వయం ఉపాధి, వ్యాపార రంగాలపై దృష్టి సారించాలని సూచించారు. సొంతంగా వ్యాపారాలు ప్రారంభించి మరికొందరికి ఉపాధి కల్పించడం గొప్ప విషయమని పేర్కొన్నారు.ఈవీ ఛార్జింగ్ స్టేషన్ల ఏర్పాటు ద్వారా ఎలక్ట్రిక్ వాహనదారులకు ప్రయాణ మార్గంలో ఛార్జింగ్ సదుపాయం అందుబాటులోకి రావడంతో పాటు పర్యావరణహిత రవాణాకు ప్రోత్సాహం లభిస్తుందన్నారు. స్టేషన్ ఏర్పాటు చేసిన పట్లోళ్ల మల్లేశం కుటుంబ సభ్యులు ఎమ్మెల్యే చింత ప్రభాకర్కు కృతజ్ఞతలు తెలిపారు. కార్యక్రమంలో మల్లేశం కుటుంబ సభ్యులు, బీఆర్ఎస్ నాయకులు, గ్రామస్తులు, స్నేహితులు పాల్గొన్నారు.