అభివృద్ధి పనులకు ఆటంకాలు కలిగిస్తే సహించేది లేదు

మహిళా శక్తి భవనం శిలాఫలకం ధ్వంసం చేసిన వారిపై కఠిన చర్యలు తీసుకోవాలి.. రుద్రారం సర్పంచ్ యాదిరెడ్డి

షాబాద్, మేజర్ న్యూస్ (నవంబర్ 08)

గ్రామ అభివృద్ధి పనులకు ఆటంకాలు కలిగిస్తే సహించేది లేదని రుద్రారం గ్రామ సర్పంచ్ యాదిరెడ్డి హెచ్చరించారు. గ్రామంలో మహిళా శక్తి భవనం శిలాఫలకాన్ని ధ్వంసం చేసిన వారిపై కఠిన చర్యలు తీసుకోవాలని డిమాండ్ చేశారు. ఈ ఘటన వెనుక కొంతమంది కాంగ్రెస్ పార్టీకి చెందిన పెద్ద లీడర్లు, మండలానికి చెందిన నాయకులు ఉన్నారని సర్పంచ్ ఆరోపించారు. ఏవైనా అభ్యంతరాలు ఉంటే నేరుగా తనతో మాట్లాడాలని, ఏమీ తెలియని యువకులు బండ అజయ్, బండి దయాకర్, అల్లాడ భరత్ లను రెచ్చగొట్టి వారితో శిలాఫలకాలను ఎత్తుకెళ్లేలా చేయడం హేయమైన చర్య అని మండిపడ్డారు.శిలాఫలకంలో పేరు లేదనే కారణంతో మాచన్‌పల్లిలో సైతం డీఈతో వాగ్వాదానికి దిగారని తెలిపారు.  మా పేర్లు ఎందుకు రాయడం లేదని మాచన్పల్లిలో నాతో సైతం గొడవకు దిగారని సర్పంచ్ యాదిరెడ్డి తెలిపారు. అసలు ఏ ప్రోటోకాల్ ప్రకారం నామినేటెడ్ పదవులు పొందిన నాయకుల పేర్లను శిలాఫలకంలో పొందుపరచాలని ప్రశ్నించారు. కలెక్టర్ కార్యాలయం నుంచి జారీ చేసిన ప్రోటోకాల్ ప్రకారమే సంబంధిత అధికారులు శిలాఫలకాల్లో పేర్లు పొందుపరుస్తారని స్పష్టం చేశారు.రాజకీయ విభేదాలను గ్రామ అభివృద్ధికి అడ్డంకిగా మార్చుకోవద్దని, శిలాఫలకం ధ్వంసం ఘటనపై అధికారులు విచారణ జరిపి బాధ్యులపై చర్యలు తీసుకోవాలని సర్పంచ్ యాదిరెడ్డి డిమాండ్ చేశారు.