సంప్రదాయాల సందడితో గ్రీన్‌వుడ్‌లో దసరా వేడుకలు

సూర్య, మందమర్రి: విద్యార్థుల్లో తెలంగాణ సంస్కృతి, సంప్రదాయాల పట్ల అవగాహన కల్పించే లక్ష్యంతో మందమర్రి మండలం తిమ్మాపూర్‌లోని గ్రీన్‌వుడ్ సీబీఎస్‌ఈ పాఠశాలలో శుక్రవారం ముందస్తు దసరా వేడుకలను ఘనంగా నిర్వహించారు. పూలతో బతుకమ్మలను పేర్చిన విద్యార్థులు, మహిళా ఉపాధ్యాయినులు సంప్రదాయ ఆటపాటలతో సందడి చేశారు. అనంతరం పాఠశాల ప్రాంగణంలో భారీ రావణాసురుడి ప్రతిమను దహనం చేసి వేడుకలకు ప్రత్యేక ఆకర్షణగా నిలిచారు. ఈ సందర్భంగా పాఠశాల డైరెక్టర్ డాక్టర్ భరద్వాజ నాయుడు మాట్లాడుతూ.. దసరా పండుగ చెడుపై మంచి సాధించిన విజయానికి ప్రతీక అని పేర్కొన్నారు. దేవీ నవరాత్రులు, విజయదశమి వేడుకలు భక్తి, ఐక్యత, సాంస్కృతిక విలువలను చాటుతాయని తెలిపారు. విద్యార్థులు, తల్లిదండ్రులు, ఉపాధ్యాయులు, సిబ్బందికి దసరా శుభాకాంక్షలు తెలియజేశారు. అలాగే పాఠశాల డైరెక్టర్ ఆకర్ష్ నాయుడు, ఏజీఎం పవన్ కుమార్, ప్రిన్సిపాల్ చంద్రమోహన్ కూడా శుభాకాంక్షలు తెలిపారు. ఈ కార్యక్రమంలో హెడ్‌మిస్ట్రెస్ క్రిస్టినా, వైస్ ప్రిన్సిపాల్ తిరుపతి, ఏవో ఖుద్దూస్, ఉపాధ్యాయ బృందం, విద్యార్థులు, తల్లిదండ్రులు పాల్గొన్నారు.