పోషణ మాసం వేడుకలు

మహాదేవపూర్ రైతు వేదికలో ఘనంగా ప్రాజెక్ట్ స్థాయి కార్యక్రమం
మహాదేవపూర్ ప్రతినిధి,
పోషణ మాసం పురస్కరించుకుని బుధవారం మహాదేవపూర్ రైతు వేదికలో ప్రాజెక్ట్ స్థాయి కార్యక్రమాన్ని అత్యంత ఘనంగా నిర్వహించారు. ఈ సందర్భంగా గ్రామీణ ప్రాంతాల్లో పోషకాహార లోపాన్ని నివారించడం, తల్లులు మరియు పిల్లల ఆరోగ్య సంరక్షణపై విస్తృత అవగాహన కల్పించారు.
ఈ కార్యక్రమానికి ముఖ్య అతిథులుగా జిల్లా గ్రంథాలయ సంస్థ చైర్మన్ రాజబాబు, వ్యవసాయ కమిటీ చైర్మన్ తిరుమల హాజరయ్యారు. ఈ సందర్భంగా వారు మాట్లాడుతూ... సమాజంలో ఆరోగ్యవంతమైన తరాన్ని తీర్చిదిద్దడంలో పోషకాహారం కీలక పాత్ర పోషిస్తుందని పేర్కొన్నారు. ప్రతిఒక్కరూ రోజువారీ జీవితంలో ఆరోగ్యకరమైన ఆహారపు అలవాట్లను అలవర్చుకోవాలని పిలుపునిచ్చారు.
అనంతరం సీడీపీఓ మరియు వైద్యాధికారులు మాట్లాడుతూ... ముఖ్యంగా గర్భిణులు, బాలింతలు మరియు ఎదుగుతున్న పిల్లలు తీసుకోవాల్సిన సమతుల్యాహారం, తీసుకోవాల్సిన జాగ్రత్తల గురించి వివరంగా వివరించారు. అంగన్‌వాడీ కేంద్రాల ద్వారా అందుతున్న సేవలను లబ్ధిదారులు సంపూర్ణంగా వినియోగించుకోవాలని సూచించారు.
ఈ కార్యక్రమంలో మహాదేవపూర్ సర్పంచ్ హసీనా భాను, మండల వ్యవసాయ కమిటీ చైర్మన్ తిరుపతిరెడ్డి, పలిమెల మండల ఎంఆర్‌ఓ , ఎంపీడీఓ , మెడికల్ ఆఫీసర్, అంగన్వాడీ సూపర్‌వైజర్లు, పోషణ అభియాన్ డీసీ , బీసీ , ప్రథమ్ మాస్టర్ ట్రైనర్, అంగన్‌వాడీ టీచర్లు, ఆయా హెల్పర్లు మరియు పెద్ద సంఖ్యలో లబ్ధిదారులు పాల్గొన్నారు.