అక్రమార్కులపై ఉక్కు పాదం

మరిపెడ ఎస్సై సతీష్ 
- కార్డన్‌ సెర్చ్‌లో 3 బైక్‌లు సీజ్‌
- 500 లీటర్ల బెల్లంపానకం ధ్వంసం, 30 లీటర్ల నాటుసారా స్వాధీనం

మరిపెడ ప్రతినిధి, వ్యతిరేక కార్యకలాపాలకు పాల్పడే వారిపై నిరంతర నిఘా ఉంటుందని మరిపెడ ఎస్సై గండ్రాతి సతీష్ హెచ్చరించారు.జిల్లా ఎస్పీ డాక్టర్ శబరీష్ ఆదేశాల మేరకు మరిపెడ సీఐ  పవన్‌కుమార్ ఆధ్వర్యంలో మరిపెడ సర్కిల్ పోలీసులు బుధవారం తెల్లవారుజామున కార్డన్‌ అండ్‌ సెర్చ్‌ నిర్వహించారు. మూలమర్రి తండా, దారావత్ తండా, తోక్ల తండా గ్రామాల్లో విస్తృతంగా సోదాలు చేపట్టి,అనుమానాస్పదంగా ఉన్న ఇళ్లు, వాహనాలను తనిఖీ చేశారు. సరైన ధ్రువపత్రాలు లేని మూడు ద్విచక్ర వాహనాలను పోలీసులు సీజ్ చేశారు.అక్రమంగా నిల్వవుంచిన ఐదు వందల లీటర్ల బెల్లం పానకాన్ని ధ్వంసం చేయడంతో పాటు ముప్పై లీటర్ల నాటుసారాను స్వాధీనం చేసుకున్నారు.నాటుసారా తయారీ, విక్రయానికి పాల్పడిన బాధ్యులపై కేసులు నమోదు చేస్తున్నట్లు ఎస్సై తెలిపారు.తనిఖీల అనంతరం గ్రామస్తులకు రోడ్డు ప్రమాదాల నివారణ, సైబర్ నేరాల పట్ల అప్రమత్తత, మత్తు పదార్థాల వల్ల కలిగే అనర్థాలపై పోలీసులు అవగాహన కల్పించారు. ప్రజలు చట్టవ్యతిరేక కార్యకలాపాలకు దూరంగా ఉండాలని సూచించారు.లేనట్లయితే కఠిన చర్యలు తప్పవని హెచ్చరించారు.ఈ తనిఖీల్లో  సీరోల్ ఎస్‌ఐ సంతోష్‌తో పాటు సుమారు 40 మంది పోలీసు సిబ్బంది పాల్గొన్నారు.