మైనారిటీ గురుకులంలో విద్యార్థిపై దాడి ఆరోపణ

సూర్య కరీంనగర్: కరీంనగర్‌లోని మైనారిటీ గురుకుల (బాలురు-1) పాఠశాలలో 9వ తరగతి చదువుతున్న విద్యార్థిపై ప్రిన్సిపాల్ దాడి చేశారంటూ ఆరోపణలు వెలువడ్డాయి. రెండు రోజుల క్రితం విద్యార్థి కేంద అక్షిత్ (తండ్రి: మహేందర్)పై ప్రిన్సిపాల్ విచక్షణారహితంగా దాడి చేసి కొట్టారని కుటుంబ సభ్యులు ఆరోపించారు. ఈ ఘటన అనంతరం విద్యార్థి తీవ్ర మనోవేదనకు గురయ్యాడని, ప్రస్తుతం ఓ ప్రైవేటు ఆసుపత్రిలో అత్యవసర చికిత్స పొందుతున్నాడని వారు తెలిపారు.ఆసుపత్రిలో చికిత్స పొందుతున్న విద్యార్థిని ఆల్ ఇండియా ఫార్వర్డ్ బ్లాక్ జిల్లా ప్రధాన కార్యదర్శి బండారి శేఖర్, 27వ డివిజన్ కార్పొరేటర్ బోట్ల శ్యామల, తంగేళ్ల కిరణ్ కుమార్ పరామర్శించి కుటుంబ సభ్యులకు ధైర్యం చెప్పారు.
ఈ సందర్భంగా విద్యార్థి తల్లిదండ్రులు మాట్లాడుతూ.. ప్రిన్సిపాల్ కొట్టడం వల్లే తమ కుమారుడి పరిస్థితి ఇలా మారిందని ఆరోపించారు. తొలుత వైద్య ఖర్చులు తామే భరిస్తామని చెప్పిన ప్రిన్సిపాల్ ప్రస్తుతం బాధ్యత నుంచి తప్పించుకుంటున్నారని వారు ఆవేదన వ్యక్తం చేశారు.విద్యార్థి వైద్య ఖర్చులను ప్రభుత్వం వెంటనే భరించాలని, ఘటనపై సమగ్ర విచారణ జరిపి విద్యార్థిపై దాడికి పాల్పడ్డారని ఆరోపణలు ఎదుర్కొంటున్న ప్రిన్సిపాల్‌పై చట్టపరమైన చర్యలు తీసుకోవాలని బండారి శేఖర్ డిమాండ్ చేశారు. బాధిత విద్యార్థికి మెరుగైన వైద్యం అందించి, భవిష్యత్తులో ఇలాంటి ఘటనలు పునరావృతం కాకుండా అధికారులు చర్యలు తీసుకోవాలని కోరారు.