హైదరాబాద్ మేజర్ న్యూస్ :: ఐఎస్ సదన్ డివిజన్ లోని విష్ణు నగర్ కాలనీలో గత పది రోజులుగా వీధి దీపాలు వెలగకపోవడంతో స్థానిక ప్రజలు తీవ్ర ఇబ్బందులు ఎదుర్కొంటున్నారు. రాత్రి వేళల్లో వీధులన్నీ చీకటిమయంగా మారుతుండటంతో ప్రజలు, వాహనదారులు భయాందోళనకు గురవుతున్నారు. రహదారిపై విద్యుత్ వైర్లు అస్తవ్యస్తంగా వేలాడుతున్న దృశ్యాలు కూడా ఆందోళన కలిగిస్తున్నాయి.ప్రజలకు కనీస సౌకర్యాలు కల్పించాల్సిన సంబంధిత అధికారులు వీధి దీపాల సమస్యను పది రోజులుగా ఎందుకు పరిష్కరించడం లేదని స్థానిక ప్రజలు ప్రశ్నిస్తున్నారు. రాత్రివేళల్లో చీకటి కారణంగా ప్రమాదాలు జరిగే అవకాశం ఉన్నప్పటికీ అధికారులు స్పందించకపోవడంపై ప్రజలు అసహనం వ్యక్తం చేస్తున్నారు.ప్రజల భద్రతతో చెలగాటమాడవద్దు! ఇప్పటికైనా సంబంధిత విద్యుత్, వీధి దీపాల నిర్వహణ అధికారులు తక్షణమే స్పందించి సమస్యను పరిష్కరించాలని స్థానికులు డిమాండ్ చేస్తున్నారు. ఏదైనా ప్రమాదం జరిగిన తర్వాత స్పందిస్తారా? ముందుగానే చర్యలు తీసుకోరా? అంటూ అధికారుల తీరుపై ప్రశ్నలు సంధిస్తున్నారు.
ప్రజలకు వెలుగులు అందించడం అధికారుల బాధ్యత. నిర్లక్ష్యాన్ని వీడి వెంటనే వీధి దీపాలను పునరుద్ధరించి, అస్తవ్యస్తంగా ఉన్న వైర్లను సురక్షితంగా సరిచేయాలని స్థానికులు కోరుతున్నారు.
