మానకొండూరులో పాత ఇనుప సామాను దుకాణంపై టాస్క్ ఫోర్స్ మెరుపు దాడి: 20 క్వింటాళ్ల రేషన్ బియ్యం స్వాధీనం

సూర్య- మానకొండూర్:  మండల కేంద్రంలో పాత ఇనుప సామాను వ్యాపారం ముసుగులో సాగుతున్న పీడీఎస్ (రేషన్) బియ్యం అక్రమ నిల్వల గుట్టును టాస్క్ ఫోర్స్ అధికారులు రట్టు చేశారు. నమ్మదగిన సమాచారం మేరకు మంగళవారం మానకొండూరు మండల కేంద్రంలోని ఓ పాత ఇనుప సామాను దుకాణంపై  టాస్క్ ఫోర్స్ ఏసీపీ సతీష్ కుమార్ ఆధ్వర్యంలో అధికారులు ఆకస్మిక మెరుపు దాడి నిర్వహించారు.టాస్క్ ఫోర్స్ అధికారుల కథనం ప్రకారం.. మానకొండూరు మండల కేంద్రానికి చెందిన నూనె మల్లయ్య 70 సం|| పాత ఇనుప సామాను దుకాణాన్ని నిర్వహిస్తున్నాడు. అయితే, ఇనుప సామాను వ్యాపారం ముసుగులో చుట్టుపక్కల గ్రామాల నుండి పేదలకు ప్రభుత్వం పంపిణీ చేసే పీడీఎస్ (రేషన్) బియ్యాన్ని తక్కువ ధరకు కొనుగోలు చేసి అక్రమంగా నిల్వ ఉంచుతున్నాడనే పక్కా సమాచారంతో అధికారులు రంగంలోకి దిగారు. మంగళవారం సదరు దుకాణంలో అధికారులు జరిపిన ఆకస్మిక తనిఖీలలో ఎలాంటి అనుమతులు లేకుండా, అక్రమంగా దాచి ఉంచిన సుమారు 20 క్వింటాళ్ల పీడీఎస్ (రేషన్) బియ్యాన్ని గుర్తించి, స్వాధీనం చేసుకున్నారు.స్వాధీనం చేసుకున్న 20 క్వింటాళ్ల రేషన్ బియ్యాన్ని మరియు ఇట్టి అక్రమ నిల్వలకు పాల్పడుతున్న నిందితుడు నూనె మల్లయ్యను తదుపరి చట్టపరమైన విచారణ నిమిత్తం టాస్క్ ఫోర్స్ అధికారులు మానకొండూరు సబ్ ఇన్‌స్పెక్టర్ (ఎస్సై) తిరుపతికి అప్పగించారు. ఈ మేరకు పేదలకు చెందాల్సిన రేషన్ బియ్యాన్ని బ్లాక్ మార్కెట్ లో విక్రయించడానికి నిల్వ ఉంచిన నిందితుడిపై కేసు నమోదు చేసి దర్యాప్తు చేస్తున్నట్లు ఎస్సై తిరుపతి తెలిపారు. ప్రభుత్వ నిబంధనలను ఉల్లంఘించి పీడీఎస్ బియ్యం అక్రమ రవాణా, నిల్వలకు పాల్పడితే చట్టపరంగా కఠిన చర్యలు తప్పవని అధికారులు ఈ సందర్భంగా హెచ్చరించారు.